فجأه الدكتور جا داخل و قال ليهم لو سمحتوا أطلعوا برا لأنكم عام | رواياتي📖📚
فجأه الدكتور جا داخل و قال ليهم لو سمحتوا أطلعوا برا لأنكم عاملين زحمه في الغرفه و دا ما ينفع ، طلعوا كلهم إلا أمي و أبوي و خالتو خنساء ، الدكتور قال لي يا المنتحره ! عارفه عملنا ليك غسيل معده كم مره ! قلت ليهو ما كان تعملو لي ذاتو ، قال لي دا كلام زعل و الزعل بروح بس الروح لو راحت ما بتتعوض تاني ، حتكوني خسرتي دنيتك و آخرتك و و و....الخ ، المهم إتكلم معاي مسافه بعدها جا فحصني و قال لأبوي وضعها مستقر رحمته بس حنخليها تبيت هنا و بكرا تطلع بإذن الله ، خلوها ترتاح هسي ، طبعاً أنا كنت مستغربه و محتاره فيهم ، يعني فجأه كدا كلهم بقوا مقلقين و خايفين علي ! حتى رغد ! لحد ما طلعوني من المستشفى هم كانوا 24 ساعه في راسي و أمي قعدت معاي لحد اليوم التالت ، قالت لي خايفه أخليك براك تقومي تعملي حاجه في نفسك ، طبعاً ناس خالتو خنساء و أواب كانوا بجوا يشوفوني و يمشوا و لو ما جوا بتصلوا ، أبوي ما قال لي حاجه بس ملامح وشي كانت متغيره و شكلو بقى مهموم ، أنا مع ذلك ما إتجاوبت معاهم بالعكس كنت نافره منهم لدرجة انو حبوبه سعاد جات و قالت لي نسوقك معانا البيت ، قلت ليها ما ماشه ، أمي قالت لي حتمشي معاي أنا ، قلت ليها ما ماشه و خلوني براي....المهم عدت الأيام و أنا لسه مقاطعاهم ، أمي كانت بتمشي و تجينا و أبوي قبل ما يطلع بجي يشوفني و يمشي ، قلت ليهم من زمان ما كنتوا شايفيني !؟ يعني الواحد إلا يكون عايز يموت حتى تنتبهوا ليهو !!؟ طبعاً عمتي من يوم أبوي شاكلها و إتضارب مع راجلها و قرب يكتلو ما جاتنا تاني ، أمي شاكلتها قدرتها و حملتها المسؤوليه لأنها إتسترت عليهو لمن إتحرش بـ براءه... المهم يوم جات خالتو خنساء مع أمجد ، قالت لي بعد دا لازم تنزلي جامعه ، إبتسمت إبتسامه باهته كدا ، قالت لي بتعتبريني زي أمك ولا لا ؟؟ قلت ليها لو كنت بعتبرك زي أمي ما كان حأتكلم معاك ...في اللحظه دي أمي جات داخله و هي شايله العصير و لمن سمعت كلامي ملامح وشها إتغيرت ، قدمت ليهم العصير و قالت ليهم أنا حأمشي بعد دا ، ودعتهم و شالت ولدها و مشت ، خالتو خنساء قالت لي أنا مصلحتك بتهمني والله و ما عايزاك تضيعي بحنس الطريقه دي ، أنا عارفه انو العملتيهو كان نتيجة لزعلك من أواب ولدي و أنا زيو حاسه بالذنب و عايزا أعمل ليك حاجه على الأقل تخفف منك شويه ، المهم في وحده قريبتي من بعيد إتعينت محاضرة في جامعة الخرطوم و قالت لي انو في شواغر ، قلت ليها بس لمن جيت أقدم ما كان في شواغر ، قالت لي ايوه ما كان في بس في ناس ما جات و سجلت و بكدا فقدوا مقاعدهم ، يعني سبحان الله كأنو مقعدك كان محجوز ، ما عايزا تعاندي و تقوي راسك ، أنسي إني أم أواب ، اتكلمت معاي مسافه لحد ما أقنعتني أنزل جامعه و كلمت أبوي ، بعد ما مشت ابوي جا قعد في السرير المقاصدني و كان متردد بعد مسافه قال لي بحاول أدفع ليك رسوم الجامعه ، قلت ليهو خالتو خنساء حتدفعهم و طوالي مشيت خليتو ، طبعاً رغد ما كانت بتتكلم معاي بس لمن اقول لـ براءه جيبي لي مويه أو أعملي لي حاجه بلقاها هي عملتها لي بس ما كنت مدياها وش ، بعدها بيومين اتفاجأت لمن أستاذ أحمد و أختو جونا زياره في البيت ! طبعاً أحمد لمن شاف رغد في المستشفى و مشى سألها حكت ليهو الحاصل علي ، المهم يومها أبوي كان قاعد ، قلت استاذ أحمد دا الجابو شنو و كنت مستغربه شديد لأني خالص ما إتوقعتو يجي ، جا سلم علي و مشى قعد برا مع أبوي و أختو و رماز كانوا قاعدين معاي و سوزان ما موجوده ، أمل دي حبيتها من أول لقاء بيناتنا لأنها ظريفه و بتدخل القلب طوالي ، رغد جات ضيفتها و مشت ما قعدت معانا ، لمن رماز تلفونها رن و مشت ، أمل قالت لي أخوي أحمد كان مُصر شديد إنو نجيكم ، قلت ليهو يا احمد ديل منو و بتعرفهم من وين فـ حكى لي إنك طالبتو و كدا ، قلت ليها فعلاً و ما قصرتوا والله ، قالت لي دا الواجب ، معقوله ما نجي نشوف مرة أخونا !! فتحت خشمي و قلت ليها شنووو !!؟ مرة أخوكم منو ؟؟ ضحكت و قالت لي إنتِ ، قلت ليها شنووو !!؟ قالت لي اوووبس شكلي إستعجلت و ما أديت أحمد فرصه عشان يفاتحك في الموضوع ، أصلاً هو جاي من هناك عشان يتناقش معاك و يعرف رايك شنو و بعدها يكلم أبوك.... طبعا في اللحظات ديك حسيت عقلي إتبلد ! كيف يعني أستاذ أحمد عايز يتقدم لي !!...بقيت أعاين ليها بعدم إستيعاب و هي شغاله تضحك ساي و تقول لي عارفه نفسي صدمتك بس دي الحقيقه ، لمن جوا عشان يمشوا أستاذ أحمد قال لأبوي عن إذنك يا عمي اسمح لي اتكلم مع بتك دقيقتين في موضوع مهم ، أبوي قال ليهو خير !؟ أستاذ أحمد قال ليهو خير خير إن شاء الله ، أمل قالت ليهو أنا ذاتي حأكون قاعده معاهم يا عمي عشان ما تضايق ، قال ليها لا العفو و أصلا واضح انكم ناس متربيه و جايه من أسره محترمه....المهم قعدنا في المظله و امل ذاتا معانا ، أنا لحد اللحظه ديك ما كنت مستوعبه حاجه و أطرافي كانت بارده ، أستاذ أحمد قال لي احم عارفك حتكوني مستغربه هسي عشان....أمل قاطعتو و قالت ليهو معليش يا
