2022-06-08 14:30:43
المشاهد الخليعة..
وإنتَ بتتصفح في فيسبوك فجأة بظهر ليك فيديو فيه منظر خليع أو وضع مُحرم؟
وفجأة برضو تلقى نفسك كملت الفيديو!
لا
وكمان جاك واحد تاني أسوأ منو؟
والعجيب إنك ح تكملهُ، وهاك يا دوامة الفيديوهات الاتكشحت فيك!
وما أظن تقيف منها إلا لو باقة الإنترنت حقتك خلصت، أو بطاريتك خلصت، أو كمان جاء زول داخل عليك!
ليه؟
عشان في غريزة جواك اتجاهه الحاجات المن النوعية دي، وبسبب الغريزة دي بتلقى نفسك وقعت فيها، ووقعت في نظر مُحرم!
ووقعت في سيئات!
واستهنت بنظر ربنا ليك!
وووو
بس والله أنا ما جاي ألومك، وما جاي أنكد عليك وأطلعك إنسان سيئ، أنا جاي أخليك تبطل الحاجة دي كيف.
طيب ركز معاي، ليه الفيديوهات دي بتظهر لي؟
ولي لمن أحضر فيديو بجي واحد من نفس النوعية بعدهُ.
طيب يا سيدي.
-الفيديو بيظهر ليك لسببين :
-الأول خوارزميات المواقع، يعني الفيديوهات البتتناسب مع موقعك بتبدأ تظهر ليك وكدا!
طيب ح تقول لي بتظهر لي فيديوهات أجنبية!
وأنا ح اقول ليك ركز أنا قلت ليك في سببين!
-السبب التاني هو التفاعل العالي، التفاعل العالي في الفيديوهات دي بخلي خوارزميات فيسبوك تزيد معدل انتشارها - بعيدًا عن الإعلانات الموولة- وبكدا ح تبدأ تظهر ليك ولي، ولي أغلب الناس في فيسبوك.
طيب كدا عرفنا السبب الفيديو بظهر لي، لكن الفيديوهات كلها بتكون لي من النوع دا لييي؟
عشان ببساطة إنتَ اتفاعلت مع الفيديو، والتفاعل هنا م قصدي لايك ولّا كومنت أو شير!
اللي إنتَ أصلا م ح تعملهم عشان ممكن تكون خايف زول يشوفك دايس لايك وكدا!
قصدي المشاهدة، توقيت جلوسك في الفيديو، يعني لو سحبت الفيديو وطلعت منو سريع هنا خوارزميات فيسبوك بتصنفك إنك م مهتم وبتجيب ليك محتوى تاني، لكن لو كملت الفيديو للنهاية، ح يتم تصنيفك إنك مهتم بالنوعية دي من الفيديوهات وح يبدأ يعرضها ليك كتير، وبحصل البحصل يا صحبي..
ركز معاي تاني!
إنت لو قلت عايز تخليها، ممكن تخليها لكن للأسف ح ترجع تاني لإنو غريزتك كدا!
طيب الحل شنو؟
الحل في إنو تهذب الخوارزميات وإنتَ بتحاول تهذب نفسك، عشان لو هذبت نفسك ونسيت الخوارزميات وظهر فيديو فجأة ح.....
إنتَ عارف قصدي
طيي ح تقول لي بِتُهذب كيف؟
-أول حاجة تعملها عايزك تحدد نوع المحتوى البتحبهُ، محتوى توعوي ديني، أو بزنس أو غيرهُ، وتبدا تفتش صفحات مميزة في الحاجة دي وتعمل ليها لايك وتتفاعل معاها، ومع أي بوست خاص بالفئة البتحبها دي.
-تاني حاجة أول ما يظهر فيديو من النوع داك، دوس زِر الكنسل " " البكون فوق الفيديو، أو أمش منو سرعة، هنا فيسبوك ح يبدأ يصنفك غير مهتم بالنوعية دي من الفيديوهات وح يبدأ يقلل ليك من وصول المنشورات اللي من النوع دا، ويزيد ليك من وصول المنشورات الخاصة بالفئة البتحبها ، وتكون صرفت خدمتك في حاجة تفيدك وتكون رضيت ربنا.
-الكلام القلتو فوق دا ما استنتاج ولا عشان أبين عندي فكرة عن التسويق وخوارزميات فيسبوك، دي مجرد تجربة شخصية عشتها ونفذت كل الكلام القلتو ليكم فوق دا وكانت ناجحة جِدًّا، فحبيت أشاركها معاكم، عشان عارف في كمية من الناس حابة تحارب الحاجة دي ونفسها أبت.
واتذكر إنو الخوارزميات بِتُهذب ما بِتُحارب.
#أمين_عبدالماجد
149 viewsأمين عبدالماجد, 11:30
ب
