ليلة عبد الله عبد الله منك حيل خجلان الماي | الشاعر حسين عبد الزهرة الدراجي
ليلة عبد الله
عبد الله منك حيل خجلان الماي
جي مارواك وذبل اشفافك هاي
كلب النهر ضل من كسر
مــــــاي الله منك يعتذر
عبد الله عبد الله
ــــــــــــــــــــــــــــــــــــــــــــــــــ
بعالم خيالي اتصــــــــورت جرحك وضل يلجمني
واكتبت عالورقه حـــــــــزن من سهمك اليوجعني
اشما شوفلك صوره انلجم وحافر احس يسحكني
ياريتني اتحـــــــــــول نهر وكت العطش تشربني
من العطش متفطره عبد الله اشفاك
من عمت عين الماي جي مارواك
طفوك يا اجمل بدر
ماي الله منك يعتذر
عبد الله عبد الله
ــــــــــــــــــــــــــــــــــــــــــــــــــ
الماي ضـــــــــــم روحه خجل عبد الله لمن شافك
ابشفت النهر حركه اطلعت جي ماوصل الشفافك
والموت عبد الله من اجه صافن بقه عله ابوصافك
وبلـــــــــــذت البوسه اخــــذ روحك وكام وطافك
الموت اجاك وباك روحك بسكوت
طاح بغرامك ياترف حته الموت
منك يفوح أجمل عطر
ماي الله منك يعتذر
عبد الله عبد الله
ــــــــــــــــــــــــــــــــــــــــــــــــــ
من سكت صوتك ياترف ضل ينسمع صوت الدم
ومئثوم مــــاي طف يضل جي منه شفتك تحرم
يالصرت طــــــــــف الوحدك عنك شريد اتكلم
السهم ميت شـــــوك اجه بنحرك بقه بس يشتم
يالبعده طولك ماوصل حته اذراع
اتبده جمالك ويه دمك عل كاع
ابنحرك غفه سهم الغدر
ماي الله منك يعتذر
عبد الله عبد الله
ــــــــــــــــــــــــــــــــــــــــــــــــــ
اسمك اذا مر عل نهر يعرك خجل من عدك
يالتوك مورد عشك شبساع صوفر وردك
يالماكمل عمرك سنه ويالموت بله اشعدك
ازغير بعدك والسهم عبد الله وموش ابكدك
عطشان يالشالك نهر هم عطشان
ولو مسهم جا هسه اشوفك كبران
وي موتتك مات الصبر
ماي الله منك يعتذر
عبد الله عبد الله
ــــــــــــــــــــــــــــــــــــــــــــــــــ
لحضات عمرك ياترف وحزنك مشيب العدلين
عنك ردتت اكتب شعر وتحيرت ابدي منين
المفروض لا مو بالحبر اكتبلك بماي العين
ازغر قتيل ابكربله وكبر جرح عد حسين
جرحك جبير ولا اضماد يلمه
المفروض ابجيلك لحد ما اعمه
وماريد وني يستقر
ماي الله منك يعتذر
عبد الله عبد الله
ــــــــــــــــــــــــــــــــــــــــــــــــــ
حسين عبد الزهرة الدراجي
