- هتروح شغلك بالقهوة بتاعتك وازازة الماية وأشيك طقم عندك وابتس | Ahmed Shawki - أحمد شوقى

- هتروح شغلك بالقهوة بتاعتك وازازة الماية وأشيك طقم عندك وابتسامتك على وشك
او هتروح وانت نازل من غير فطار ومكشر وعمال تندب حظك.. في الحالتين هتروح الشغل.
- هتعملي شغل البيت وانتي مشغلة حاجة مفيدة تسمعيها وفاتحة الشبابيك الشمس تدخل ومبتسمة وبتحتسبي الأجر.
- او هتعمليه وانتي متّقلة منه وحاسة انه عبء كبير .. في الحالتين هتعمليه.
- هتذاكر وانت مشغل تطبيق بومودرورو ومانع المشتتات وبتستخدم الوان واستيكي نوتس جميلة وتستمتع بالمذاكرة.
او هتذاكر وانت غاصب على نفسك وكل شوية تهرب وتفتح سوشيال ميديا.. في الحالتين هتقعد تذاكر.
- هتدخل الباص وتختار اريح كرسي ليك على الجنب اللي بيطل على الخضرة وتسمع قرآن او حتى تشغل بودكاست او تقرأ.
- او تقعد متأفف من السفر وتستنى الوقت ده يخلص بأي طريقة، في الحالتين هتسافروتوصل إن شاء الله.
- هتربي عيالك وانتي ممتنة ان ربنا كرمك وبقيتي ام، فتصحي بدري تصلي وتحضري الاكل وتروقي البيت وتذاكري للعيال بحب وصبر واحتساب للأجر.
- او هتعيشي في نكد يومي واعصابك تبوظ منك من كتر الزعيق.. في الحالتين عيالك هيكبروا.
حياتك هتتغير لما تفهم انك ف ايدك انت اللي تغيرها، لما تبطل شكوى وتبدأ تعيش بحب وايجابية وتفاؤل ورضا.
جرب من النهاردة ومن اللحظة دي تتعامل معاملة جديدة مع شغلك ودراستك واهلك وصحابك ونفسك.. وشوف الفرق.
عيش بالحب.. وإلا هتموت بالهمّ.
والسلامُ خِتام..))
-ميرا سمير، بتصرف