بسم الله : رمضان مش باكدج , رمضان كل ثانية فيه حياة.. عايز أقو | Ahmed Shawki - أحمد شوقى
بسم الله : رمضان مش باكدج , رمضان كل ثانية فيه حياة.. عايز أقول كلمتين للناس اللي ما بدأتش من أول رمضان في القرآن ولا القيام وكمان الناس اللي بدأت بس بدأت تكسل وتقع وللناس اللي لسه ما قاطعتش المسلسلات والبرامج الكلمتين هما : ما تيأسش. آه ما تيأسش من نفسك ومحاولاتك في إنك تتغير للأحسن ما تيأسش إنك تلتزم بورد قرآني من دلوقتي ما تيأسش إنك تقيم الليل من انهاردة ما تيأسش إنك تقاطع المسلسلات من انهاردة ودا اللي أنا عايز اوصلهولك في البوست دا وهو إن رمضان مش "package" حٍزمة علي بعضها ياتلحق تلتزم من أوله لآخره يايكون ضاع عليك رمضان.. رمضان كل ثانية فيه لوحده بساعات عبادة فاستغل ولو آخر ثانية في رمضان .. -حتي ولو ما بدأتش من الأول ؟ آه -حتي ولو وقعت في النص آه استغل في رمضان الثانية اللي تلحقها واللي يكون قلبك صاحي فيها حتي ولو هتقع بعدها .. ما فيش مشكلة لسه قدامك فرصة دايما إنك تفوز وتعوض تقصيرك مهما كان ومهما فاتك لإن رمضان حسابات ربنا غير حسابات البشر
