مش عارف تذاكر ومزنوق وسط المواد مش عارف تفلفص وتلاقي حل تلم بي | Ahmed Shawki - أحمد شوقى

مش عارف تذاكر ومزنوق وسط المواد مش عارف تفلفص وتلاقي حل تلم بيها كل المواد بنفس الشغف والحماس وبنفس التركيز ؟!!

ركز فالبوست ده هتطلع بتقنية عالية أوي هتساعدك تذاكر كويس وتحافظ علي حماسك وشغفك في المذاكرة , متعملش SAVE وطبق المعلومة اللي بتتقالك فوراً .

فيه كاتب إسمه " فرانشسكو سريلو " كان زيك بالظبط مزنوق نفس زنقتك وكل لما يذاكر شوية يزهق ومش عارف يحافظ علي تركيزه بشكل كبير , وفي يوم من الأيام صحي علي المنبه بتاعه اللي علي شكل " طماطمايه " ومن هنا جاتله فكرة قوية جدا لما نفذها جابت معاه نتائج رهيبه وقدر من خلال الفكرة دي يحافظ علي تركيزه ويذاكر أكتر في وقت كويس .

إحنا الأن في حضرة الفكرة العظيمة ( Promodoro Technique ) وقسمها العبقري فرانشسكوا إلي 3 مراحل مهمة جداً وهم :-

1/ الطريقة :- وهي عبارة عن

_ 25دقيقة + 5دقائق راحة .
_ 25دقيقة + 5دقائق راحة .
_ 25دقيقة + 5دقائق راحة .
_ 25دقيقة + 5دقائق راحة .
_ 30 دقيقة راحه , ثم كمل مذاكرتك بنفس النسق تاني .

2/ التحضيرات :- وهي عبارة عن

_ تحضر List بالحاجات اللي المفروض تذاكرها .
_ تظبط منبه علشان ينظم وقتك حسب البرومودورو تكنيك , ودي تطبيقات هتساعدك ( Tide _Brain Focus ) .
_ تجيب الترابيزه أو المكتب بتاعك .
_ كل الموارد اللي هتساعدك في المذاكرة ( أقلام _ كتب _ مسطرة _ أله حاسبه ) .
_ هتجيب كل المأكولات الخفيفة اللي هتتسلي عليها وقت البريك بتاعك زي الشيكولاته والشيبسي و البسكويت والموز والبندق .
_ السرير واللاب والموبايل والنت ممنوعين منعاً باتاً .

3/ أعداء الطماطم :-

_ فرانشسكوا شايف إن الشخص المُنتج الحقيقي هو اللي يقدر يخلص 250 دقيقة مذاكرة في اليوم , وده معناه إنه يطبق طريقة البرومودورو تكنيك 10 مرات بنفس الخطوات .

_ مشتتات التركيز :- ودي اللي بتنقسم إلي نوعين :-

1/ الأفكار الداخلية :- ودي زي فكرة مشروع هتكسبك ملايين الدولارات , صاحبك اللي زعلان منك , الدكتور اللي هيسقطك , الكورة اللي هتجننك , أفكارك الخوزعبلية في تحسين كوكب الأرض العريق , مؤامرات كوكب الأرض عليك , الشغل ومصايبه , وباقي أمثلة التفكير العميق الخيالي .

حل الموضوع ده حاجة واحده بس :- ورقة وقلم وسلة مهملات جمبك , إكتب الفكرة وكرمشها وإرميها في سلة المهملات , ماتفضلش تفكر فيها .

2/ المؤثرات الخارجية :- ودي زي السوشيال ميديا , ومتابعينك علي تيك توك , والبوست بتاعك اللي هيغير الكوكب , وصوت أسرتك في البيت , والفرح اللي تحت بيتكم .

ودي الحل بتاعها إفصل النت , حمل الفيديوهات اللي هتذاكرها عالنت وذاكرها من غير نت , إطبع الماتريال الإلكترونية وذاكرها ورقياً , بلغ أسرتك إنك بتذاكر فيوطوا الصوت ومحدش ينادي عليك , إقفل شباك أوضتك علشان صوت الفرح يقل ومتفتحوش وتفضل ترقص .

" ملحوظة في ألاخر مش شرط تكون الطريقة 25 دقيقة ممكن تكون 35 دقيقة أو 50 دقيقة علي حسب قدراتك العقلية والإستيعابية " .

ولو عجبك المقال ده إعمل Share وإعمل Mention لإصحابك وإكتب Comment بمشكلتك لما بتيجي تذاكر وهرد عليك بحل ليها .