2022-07-25 13:37:20
بمناسبة التايملاين المبتهج باحتفالات نتيجة الشهادة الأساسية نبارك للناجحين ونقول:
علموا اولادكم انو النجاح في الحياة ما معتمد على نتيجة امتحان الشهادة الاساسية ولا الأكاديميات وحدها..
مجرد انو ولدك اجتهد وذاكر وحاول دا كافي جدا انو يتم الاحتفاء بيهو وتهنئته..
توريط الاولاد داخل منافسة اعتباطية مع اولاد أهله او الجيران هو خطأ كبير، لانه مهما جاب من مجموع ح يحس بالدونية لانو لابد يكون في زول جاب اكتر منو، اللهم إلا أوائل الشهادة ناس 279..
اعرف انو ولدك كونه اتعلم انو يضع هدف ويسعى ليهو بغض النظر انو وصل ليهو او لا دا في حد ذاته نجاح، لانو وضع الأهداف والسعي ليها بتعتبر قيمة اتعلمها وهي أهم من الوصول وتحقيق المأمول.
ابنك نجاحه في انو يتعلم ليهو قيم عليا، يتشرب أخلاق مثلى، يتدرب على سلوك صائب، يتعرف على مواهبه وينميها، يكتشف نقاط ضعفه ويقويها، يكتسب مهارات تواصل وذكاء اجتماعي ويمارسها...إلخ ، لانو دي الحاجات البتحدد نجاحه في الحياة عموما كشخص.
كلنا بنعرف ناس كانوا أيام الأساس مستوياتهم الأكاديمية متدنية ودرجاتهم ما متفوقة واتوفقوا في الثانوي والجامعة وحاليا من أنجح الناس في سوق العمل والحياة عموما..
الشهادة الاساسية هي أساسية أكاديميا وأساسية نفسيا وسلوكيا أيضا فهي بتأسس عند الأولاد شخصيتهم فيما يخص التعاطي مع التحديات وفهم معاني وقيمة النجاحات؛ فما تكسروا مجاديف اولادكم، ازرعوا فيهم الإحساس بالقدرة على الإنجاز مهما خابت المحاولات ونموا داخلهم روح التحسن وميزة التدارك مستقبلا مهما كان الواقع مخالف للآمال.
وهنا اذكر والدي الفذ الفريد أطال الله عمره، فقد كان يمر علي وأنا اذاكر واضغط على نفسي فيقول لي : والله يا ابني حتى اذا ما جبت نتيجة كويسة فإنت بالنسبة لي متفوق لأنك ما مقصر وباذل اقصى جهدك، وعندها كانت تهطل على غيمة من الارتياح فتغمرني اطمئنانا وتغسل توتري وتساعدني على المذاكرة بهدوء وروية وتركيز.
كتبه د. Osman Abdelhalem
101 viewsالبَرَّاء عَادِّل •, 10:37