عودة السبايا. ................           .................... | حيدرموسى الرميثي

عودة السبايا.
................           .....................


من السبي ردينه جينه نزورك.
ما أرتاحينه منهد عاشورك.

،،،،،،،،،،،،،،،،،،،،،،،،،،،، ١

الكربله اجينه بعد طول السفر.
بالنهار الشمس بالليل السهر
ظلمه صار الكون من بعد الگمر.

من بعد نور الگمر وي نورك.
ما أرتاحينه منهد عاشورك.

،،،،،،،،،،،،،،،،،،،،،،،،،،،،، ٢
نمشي بالوديان والخوف ورعب.
لليتامه مابقت روح وگلب.
دموع سكنه والرباب اتضل تصب.

چان خيمه  الهن يظلل سورك.
ما أرتاحينه منهد عاشورك.
،،،،،،،،،،،،،،،،،،،،،،،،،،،،،،،،،،،،٣


ماخلص دور العقيله ام الخدر.
كملت باقي الرساله أم الصبر
الراية بيد أم الخدر ماتنكسر.

زينب الناصر تضل منصورك.
ما أرتاحينه منهد عاشورك.
،،،،،،،،،،،،،،،،،،،،،،،،،،،،،،،،،،،،،،٤

بالدرب ماتت رقيه وما أجت.
أرواحنه وياهه مشت لمن مشت.
فوگ راسك ماتت النجمه وهوت

بالسبي  تغفه  و تموت أطيورك.
ما أرتاحينه منهد عاشورك.
،،،،،،،،،،،،،،،،،،،،،،،،،،،،،،،،،،،،،،٥

بربعينك جينه نبچي الكربله
تزور گبرك  گوم  شوف العايله
بيد زينب شوف أثر  للسلسله

حسين تتلگه الضيوف   بدورك.
ما أرتاحينه منهد عاشورك.

،،،،،،،،،،،،،،،،،،،،،،،،،،،،،،،،،،،،،،،،،،،،،،،،


حيدرموسى الرميثي.