2021-04-21 19:04:48
گؤزوم وطن
او ، ويقارلي داغلارينـدا
هلهده وار گـؤزوم وطن
قـرهنفيللي بـاغـلاريندا
هلهده وار گـؤزوم وطن
چمنلرين هرگـؤلونـده،
نغمه قوشان بولبولونـده
بوغدا لارين سونبولونده
هلهده وار گـؤزوم وطن
برهکتلـي خيرمانينــدا،
يـام ياشيللي اورمانيندا
داغلارين بوز دومانيندا
هلهده وار گؤزوم وطن
يـايـلاغيندا، قيشلاغيندا
چايـلاغيندا، قوملاغيندا
آوچيلارين، آولاغينـدا
هلهده وار گؤزوم وطن
برهچينين، بــرهسينده
کهليکلرين فـرهسينده
يئنه «تولکو»دهره سينده
هلهده وار گـؤزوم وطن
يول يولاغين بوروغوندا
کؤده لــرين قوروغوندا
«آغري»نين مارماريغينـدا
هلهده وار گــؤزوم وطن
«بورزهلي»نين اتــهيينده
«جعفرانلي»پتـه يينــده
چوبـانـلارين توتهيينده
هلهده وار گـؤزوم وطن
بيچينچـينين، بيچمهسينده
آيران توتوب، ايچمهسينده
بيلديـرچينين اوُچمهسينده
هلهده وار گـــؤزوم وطن
بـالدان شيرين بولاغينـدا
توستو لهين اوجاغينـــدا
بيرده يـاتـام قوجاغينــدا
هلهده وار گـــؤزوم وطن
آيريــــلان يـار و يولداشدا
قوحوم، قونشو دا، قارداشدا
تنـديـــر اوسته پيشن آشدا
هلهده وار گـــــؤزوم وطن
پـاييزين بول زومارينــــدا
قيشين آغ آپبـــــاغ قاريندا
گول چيچکلـي بـاهارينــدا
هلهده وار گــــؤزوم وطـن
سئويملــي بـايرام آيينــدا
آخير چرشنبه پـايينـــــدا
کـؤمور سماوار چايينـــدا
هلهده وار گــــؤزوم وطن
بـاغچالارين قونـچاسيندا
توي دويونون بوخچاسيندا
گلينلـرين خونــچاسيندا
هلهده وار گـــؤزوم وطن
کورسولرين پَهــرهسينده
قاريـلارين جَهــرهسينده
چالخالانان نهــرهسينـده
هلهده وار گــؤزوم وطن
چوووشلارين گورسسينده
زائــرلــرين هـوهسينده
سوغاتينــدا ، سَلهسينـده
هلـهده وار گـؤزوم وطن
خوروزلارين آوازينــدا
سحرلــرين نـامازينـدا
آنـامين جانـامازينــدا
هلهده وار گـؤزوم وطن
گؤزهللـــرين ملهيينده
سئوگي دولو اورهيينده
عمهمين ال چؤرهيينده
هلهده وار گؤزوم وطن.
دکتر ابوطالب الهیاری
@jooshin
419 views16:04