2021-04-17 10:41:42
جوشون
دورد طرفین گول؛ چیچکلی باغچا؛ باغ
نه گوزلسن آنا یوردوم آی جوشون؛
قارینج- قارینج دولانسامدا دونیانی؛
منجه؛ سنه تاپیلماز هئچ تای جوشون
سولوندا "بال یئمز"؛ "بویوک بورزلی"
ساغین " ترنه بوزان"؛ دونیا گوزلی؛
"داشلی چشمه"سویون دادلی؛ مزه لی
"کرگن" دوشوب؛ ایچر اوردا چای جوشون
سهند؛ ساوالاندان تاج آلیب قالان؛
گورنه سما بویدا اوج آلیب قالان
یاغی دوشمانلاردان باج آلیب قالان
چکنده کوروغلو های؛ هارای جوشون
سوزوم یوخدو یئر اوزونده چوخدو داغ
تمثیل ائدیم داغلارینا یوخدو داغ؛
تاریخ بویو آلنین آچیق؛ اوزون آغ
لکه سیزسن؛ سانکی گونش؛ آی جوشون
داغدان ایمکله ییب؛ اننده گونش
ساری یایلیق آچار سیننده گونش
گوم گوی گوللرینده چیمنده گونش
چولغالایار چول؛ باییری های جوشون
کهلیک اوتو داغ دوشونده قوخویار
زومرود قوشو قایالاردا اوخویار
"جب"لرینده قومرو یووا توخویار
بولبول دئیر گوللره لایلای جوشون.
دوغولدوغوم؛ بوی آتدیغیم وطنسن؛
گوزلریمده بیر بهشت عدنسن؛
مرحمت ائت؛ ساخلا منه کفن سن؛
قوی دئسینلر آلدی توتقون پای جوشون.
دکتر ابوطالب الهیاری.
ارسالی علی پور ابراهیم
@jooshin
600 views07:41