2021-06-25 07:52:53
#Şeir_شعر
آللاه بو دونیایا شاعیر گؤندَرمه
ائلشن عظیم
ایناملار، ایمانلار قیریلیر ایندی
شاعیره دلیلر وورولور ایندی
گؤزللر شؤهرته ساریلیر ایندی
آللاه بو دونیایا شاعیر گؤندرمه!
بیر بنده گؤزونده گؤرمورسن آخی
داغیلان کؤنلونو هؤرمورسن آخی
او بخت دئدیینی وئرمیرسن آخی
آللاه بو دونیایا شاعیر گؤندرمه!
دردی بول ها بولدو چاراسی یوخدو
درمانی تاپیلان یاراسی یوخدو
دونیانین شاعیرله آراسی یوخدو
آللاه بو دونیایا شاعیر گؤندرمه!
او الی قابارلی فاغیری گؤندَر
او پولو اؤزوندن آغیری گؤندر
نا کیشی، نا دوروست یا اوغرو گؤندر
آللاه بو دونیایا شاعیر گؤندرمه!
نادانا اَییلیر ائحتییاجیندان
بیر اَیری یول تاپیر اؤلمور آجیندان
تا ساییب آسمیرلار دار آغاجیندان
آللاه بو دونیایا شاعیر گؤندرمه!
ایلان قویروغو وار اومید اوجو یوخ
بیر سؤز تشنهسی یوخ، شعیر آجی یوخ
دونیانین دویغویا ائحتییاجی یوخ
آللاه بو دونیایا شاعیر گؤندرمه!
هله واختی دئییل قینیندا ساخلا
بلکه لازیم اولدو سونوندا ساخلا
ائله خوشون گلیر یانیندا ساخلا
آللاه بو دونیایا شاعیر گؤندرمه!..
@Chiragh1
218 views04:52