مشي مشي ، نگصد كربله مشي مشي ، و الصوت اعتله لبيك يا أبا عبد | الشاعر علي حسن الكناني
مشي مشي ، نگصد كربله
مشي مشي ، و الصوت اعتله
لبيك يا أبا عبد الله ،، لبيك يا أبا عبد الله
؛؛؛؛؛؛؛؛؛؛؛؛؛؛؛؛؛؛؛؛؛؛؛
من مشينه ، حُسين ، تدري بينه ، حُسين
بينه لهفة للزيارة عفنه كل شي و ما نعوفك
خطوة خطوة ، حُسين ، كلها فدوة ، حُسين
لو عُمر كامل و حقك نمشي و الغاية نشوفك
إحنا إي مشايه ، شلنه بالچف راية
دوم إلك وفايه ، يااااا حُسين
أمنيتنه نطوفك ، والله لا منعوفك
إعتبرنه ضيفوك ، يااااا حُسين
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
من هتفنه ، حُسين ، بيك شفنه ، حُسين
جنة الباري الوسعية و خَذنَه عِبرة من خلودك
بينه لهفة ، حُسين ، والله وسفه ، حُسين
ما نطب للجنة و إنت رحمة للعالم وجودك
صار طفك جنة ، و احنه الك نتعنه
لو سمحت ادخلنه ،، ياااا حُسين
جنتك ردناها ، سبحان مَن سواها
لجلك و علاها ،، يااااا حُسين
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
هالكرامة ، حُسين ، بالخدامة ، حُسين
و الشرف لهل المواكب من يخدمونك يزاير
الله حبهم ، حُسين ، و إنتخبهم ، حُسين
گالوا إحنه أهل الضيافة و اليجي ما يبقى حاير
صاحوا إحنه و ذوله ، بخدمة اليمشوله
بالعشگ نادوله ، يااااا حُسين
ما نمل من عدهم ، خلهم و زيدهم
بعد ردنه بگدهم ، يااااا حُسين
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
فدوة عمري ، حُسين ، آنه أدري ، حُسين
والله من كل الطوائف ناس صاروا زايرينك
إنت باقي ، حُسين ، و العراقي ، حُسين
فاتح الكل الدول بابه و تحزم لجل عينك
ما يرد خطارك ، غالي كلمن زارك
هاي من أسرارك ، يااااا حُسين
لليجيك إبهمه ، احنه رسم الخدمة
هذا زاير إسمه ، يااااا حُسين
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
يا عشگنه ، حُسين ، لا تردنه ، حُسين
من ضريحك خائبين و منّه إقبل هالزيارة
لو وصلنه ، حُسين ، إسمحلنه ، حُسين
نقبل أعتاب الضريح و منك نريد البشارة
خل نشوف الطافك ، كلها حلوة اوصافك
خسر كل من عافك ، يااااا حُسين
گول إجوا خطاري ، يا هلا بزواري
يا حبيب الباري ، يااااا حُسين
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
#مشي_مشي
#علي_حسن_الكناني
رابط الخاص
@Ali22kinani
https://t.me/kinani16