لو خيروني ، إنت بس أختارك شكراً حُسين بگد عدد زوارك ؛؛؛؛؛؛؛؛ | الشاعر علي حسن الكناني

لو خيروني ، إنت بس أختارك
شكراً حُسين بگد عدد زوارك

؛؛؛؛؛؛؛؛؛؛؛؛؛؛؛؛

شكراً يمن رحت آنه فدوه إلمحبسك
شكراً يالمخليني أحضر مجلسك
مو هوه كون أتمنى كون أتنفسك
أرزقني حُب مثل الرزقته العابسك

إعطف عليه إلهمني من أسرارك
شكراً حُسين بگد عدد زوارك

؛؛؛؛؛؛؛؛؛؛؛؛؛؛؛؛؛

شكراً يالمخليني دوم أبچيلك
مقتل الكافل ويلي ماخذ حيلك
بالأربعين أفتخر من أمشيلك
حسبت دخيل و ما ترد دخيلك

متفضل و حاسبني من خطارك
شكراً حُسين بگد عدد زوارك

؛؛؛؛؛؛؛؛؛؛؛؛؛؛؛؛؛؛؛؛؛

شكراً يالمشوفني روعة عالمك
رافعني و موصلني رُتبة خادمك
إلهام إنت و فايز المستلهمك
سلطان و تخلي الفقير يكلمك

يمروح الظلمة بعظيم أنوارك
شكراً حُسين بگد عدد زوارك

؛؛؛؛؛؛؛؛؛؛؛؛؛؛؛؛؛؛؛؛؛؛

لو خيروني بجنة حيل چبيرة
و الحَبك يخلونه بأصغر ديرة
عن خدمتك هذا الوجه ماديره
راسي إبتهج بس بوكت تطبيرة

إشما نقدم ما نوفي إيثارك
شكراً حُسين بگد عدد زوارك

؛؛؛؛؛؛؛؛؛؛؛؛؛؛؛؛؛؛؛؛؛

إنت إلك ماخذني و مدليني
و بحضرتك أستحي من أرفع عيني
بيوم الحشر غيرك منو ينجيني
تعرفني زين و إنت المربيني

بتراب أقدام اليجوك أتبارك
شكراً حُسين بگد عدد زوارك

؛؛؛؛؛؛؛؛؛؛؛؛؛؛؛؛؛؛؛؛؛؛؛

من أسمع المقتل أعاتب روحي
جروحك چبيرة و هينه حيل جروحي
لا دمع يوفي لا لطم لا نوحي
شنطيك ما يوفيك يا مذبوحي

تكسر گلبنه من تجينه أخبارك
شكراً حُسين بگد عدد زوارك

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

#شكرا_حسين
#علي_حسن_الكناني

رابط الخاص

@Ali22kinani

معرف الإنستا

Sh_a_h_k

https://t.me/kinani16