أنا عارفة انو الحياة مراحل..والدنيا متقلبة شدييد اكتر من قليب | كلام سوداني من القلب❤️
أنا عارفة انو الحياة مراحل..والدنيا متقلبة شدييد اكتر من قليب زنوية في السرير .. ولهذا السبب بالتحديد فأنا دايماً بحاول استمتع بأي لحظة حتى لو كانت الظروف مرات ما بتساعد ومرات بتكون أبشع من قدرتي على تحملها .. أكيد الحياة ما دايماً بتكون في صفي .. لكن وإن جارت علي فدوماً أنا مستعدة بعون الله على هزيمتها بالإبتسامة والكثير من الضحكات الصادقة! دايماً بتخيل أخوين عايشين أسوء الظروف على الإطلاق وانعدمت كل سبل الراحة والحياة الكريمة لكن واحد فيهم قرر انو يبطل يندب حظو و يتنفض و يتمرد على الحزن و يشوف طريق للخلاص وهو سعيد بقسمته و مبسوط بالجحيم الهو عايشو لأنو متيقن انو النور قداام وانو لا يكلف الله نفساً إلا وسعها! .. وبفضل الله ونعمته علي انو وفقني اني اكون دايماً الزول دا! .. طبعاً كتير بقع و كتير بنهزم في معارك الحياة الطاحنة وكتير الطرق بتتسدا في وشي من كل الإتجاهات وكتير بتألم و ببكي لكين حتى وأنا ببكي بفكر انو بعد ما امسح دموعي شنو اول حاجة ممكن اعملها عشان افرح ؟؟ .. ايوة عشان افرح بعيداً عن تصليح الوضع المتأزم الأنا فيه..لازم افرح أول..لازم نفسياتي تكون كويسة عشان اعرف افكر بطريقة صح واقدر اطلع من أي مأزق.. لأنو أنا مقتنعة انو الحزن زي السواد الزول بعدو ما بقدر يشوف أي شي قدامو ولا حيعرف يتصرف صح!
خلاصة القصة انو و من تجارب شخصية كتيييرة اتأكدت انو "السعادة فعلاً قرار"! .. والبفتش عن الفرح حيلقاه حتى وهو وحلان في الطين من أولو لآخرو خليكم من الطين البفتش على السعادة حيلقاها حتى وهو في حرب و مهدد للموت في أي لحظة "و عن تجربة شخصية كمان" .. والبفتش عن الحزن والنكد حياتو كلها حتكون عبارة عن نكد .. وما حيلقى السعادة حتى وهو عايش ملك في قصره ممكن يُهيأ إليه عادي انو القصر خانقو! 23/6/2023 #زُبيدة_الزومة #زُبيديات
