لو اتعمل بالطريقة الصح .. والفحص التاني RDT او ICT ، ودا الفح | امبراطورية المختبرات الطبيةDC MLS

لو اتعمل بالطريقة الصح ..

والفحص التاني RDT او ICT ، ودا الفحص السريع ومميزاتو انو بيحدد نوع الطفيل بس عيبو لو الفيلم منتهي او المحلول منتهي او ظروف تخزينو سيئة ممڪن يخطئ التشخيص ويديك false negative ..

وڪتير من حالات الملاريا البتتشخص مرتين او ثلاثة خلال شهر واحد بتڪون لسببين منها الفحص ما دقيق ، والسبب التاني ممڪن يرجع لجرعة دواء غلط او في زمن غلط او دواء فقد فاعليته واصبح الطفيل مقاوم ليهو زي الحقن الزيتية Artemether ..

ولتشخيص الملاريا مافي حاجة إسمها (ملاريتي بعرفا) عشان الملاريا بيفحصوها ما بيحسوها ، وبيفحصوا معاها حاجات تانية لأنها مرض بيصيب أعضاء ڪتيرة في الجسم خاصة لو ڪانت وخيمة complicated مثلاً فحص الهيموجلوبين Hemoglobin concentration والصفائح الدموية Platelet count ووظائف الڪبد Liver function ووظائف الڪلى Renal function وأملاح البلازما Electrolyte concentrations خاصة الصوديوم ...الخ

وطبعاً الاڪتر عرضة للإصابة هم الحوامل والاطفال دون 5 سنوات والساڪنين مناطق ما موبوئة وجوا لمناطق موبوئة ، والأجنة داخل الأرحام ممڪن تجيهم الملاريا عبر المشيمة اذا ڪانت الام الحامل مصابة بالملاريا ..

بالنسبة للعلاج ، الخط الأول للملاريا البسيطة uncomplicated هو حبوب الڪوارتم واللي بتتڪون من مادة الآرتميثر واللمفاترين artemether-lumefantrine ، وبرضو حبوب الدهب Duo-cotex40/320mg واللي بتحتوي على البرايموڪوين piperaquine والدايهايدروارتميسينين dihydroartemisinin واللي بيدوها عشان تمنع عودة الملاريا الحبشية بسبب وجود piperaquine ..

والخط الثاني هو حقن الآرتسيونيت الوريدية واللي بتجي بتلات تراڪيز 30 و 60 و 120 بحسب وزن المريض ..

والخط الثالث هو الڪينين وبيستخدم للملاريا الخبيثة severe malaria ، وبيجي في شڪل حبوب او حقن وريدية بتحل في السوائل الوريدية ..

والڪينين هو الاڪثر اماناً للحوامل خاصة في الشهور الأولى للحمل ، بعڪس باقي علاجات الملاريا ..

والحقن الزيتية Artemether طلعوها من البروتوڪول العلاجي بواسطة الصحة العالمية WHO بعد ظهور اطوار طفيلية مقاومة ليها وفقدانها لفعاليتها ، لڪن بيتم استخدامها حتى الآن في مرافق ڪتيرة ..

وهنا في حاجة الناس تاخد بالا منها انو لو المريض اخد حبوب مثلاً artemether-lumefantrine او ڪوارتم وإستفرغ مابين ساعة لي ساعتين من زمن الجرعة فلازم تتڪرر لانها بتعتبر جرعة ملغية ، وهو بيڪون فاڪر إنو خلاص اخد الدواء ويجي يشتڪي إنو الملاريا ما راحت او يقول رجعت ليهو تاني ..

بالنسبة للناس البيستهتروا بالملاريا ويقولوا بعالجوها بالعرديب وشية الجمر وام فتفت بالشطة الخدراء والقريب فروت الرسالة العاوز أوصلا ليهم إنو الملاريا خطيرة جداً جداً وبتقتل سنوياً 435 الف شخص و 61% منهم اطفال دون الخمسة سنوات ..

ومن مضاعفاتها تجمع السوائل في الرئة وضيق التنفُس وفشل في وظائف الڪبد والڪلى و تمزق الطحال وفقر الدم وتورم خلايا المخ وضمورها والغيبوبة والوفاة ..

بتمنى أڪون غطيت الموضوع والناس إستفادت ولو نسيت شئ وإتذڪرتو حاخلي المنشور قابل للتعديل ..

وربنا يحفظ الجميع من ڪل سوء
امبراطورية المختبرات الطبية علي تلغرام