2023-05-10 13:35:51
عاوز أحكيلم على موقف اتعلمت فيه درس غالي أوي أوي !
زمان في رمضان 2007 تقريبا ، كنت لسة أعزب ، وكنت عايش لوحدي ، كنت بجتهد جدا في إستغلال كل لحظة من رمضان في العبادة !! كنت عامل لنفسي برنامج دسم جدا من العبادات بالليل والنهار !! وللأسف الموضوع ده خلاني أفرح بنفسي شوية وأحس إني من العُبّاد !! قلبي دخل فيه "العُجب" وكنت حاسس إن مفيش حد زيي !!
جيت في العشر الأواخر وزودت البرنامج بتاعي !
وبعدين جت ليلة 27 رمضان ، فقلت لازم أعمل فيها اللي ما يتعمل !!
طبعا الواحد كان بيجتهد في الليالي الوترية كلها لكن ليلة 27 دايما ليها إحساس خاص !!
صليت المغرب وفطرت ، وبعدين قلت أنا هنزل أصلي العشاء جماعة في أي مسجد صغير جمبي ، وأرجع البيت أنام ساعة ونص بالظبط وأقوم بقا أصلي القيام لحد أذان الفجر !!!
ساعتها كان رمضان في الشتاء والليل طويل
المهم نزلت فعلا أصلي في زاوية صغيرة جمب البيت
لقيت المسجد فيه 5 - 6 أفراد بالظبط !!
3 كبار في السن و 2 شباب عندهم محل ملابس جمبنا ، وخادم المسجد !
لما دخلت لقيت خادم المسجد راجل كبير في السن ، جالي وقال لي : لو سمحت يا شيخ ، ممكن تصلي بينا العشاء والتراويح ؟؟
قلتله : لا والله معلش ، انا هصلي بيكم العشاء بس وامشي عشان عندي ارتباط !
فقال بتأثر كدة : طب عشان خاطري معلش ، انهرده ليلة القدر ، واحنا مش لاقيين حد يصلي بينا
لو تصلي بينا وتقرأ حاجة خفيفة ، وفي النص تقول كلمتين كدة (قال الله وقال الرسول) عشان ما تضيعش علينا الليلة !!
قلتله : سامحني والله ، فعلا مش هقدر !!
المهم ، دخلت صليت بيهم العشاء ، بعد ما خلصت ، لقيتهم كلهم بيبصولي نظرة كدة كلها تعلّق واستعطاف كإنهم بيقولولي : الحقنا وماتسيبناش !
بصيت في الساعة ، وقلتلهم : خلاص ماشي هصلي بيكم ان شاء الله !
يا عيني فرحوا جدا جدا وخادم المسجد وشه نور من الفرحة ، وراح قايم وقال زي ما بيقولوا في الحرم بصوت عالي : صلاة القيام أثابكم الله
المهم ، صليت بيهم 8 ركعات قرأت فيهم سورة يوسف مقسمه على الصلاة كلها !
وبين الـ 4 ركعات قولت كلمتين كدة عن الدعاء اتأثروا بيها جدا ! وبعدين صليت الوتر ودعيت ، وسلمت عليهم ومشيت !
وانا ماشي كلهم سلموا عليا بحرارة والكبار خدوني بالحضن
رجعت البيت ، ظبط المنبه ساعة وتلت بالظبط ، ودخلت أنام…
تخيلوا ايه اللي حصل بعدها ؟؟
صحيت على أذان الفجر !!!!
قومت على الأذان ، اتصدمت صدمة !!! والله من كتر الصدمة فضلت قاعد متنح في مكاني 10 دقايق مثلا !!!
ياربي ! ولا ركعة ؟؟ ولا حتى بق مية اتسحر بيه يارب ؟!
ساعتها كل آيات وأحاديث المنافقين نزلت على دماغي
"ولو علم الله فيهم خيرا لأسمعهم" !!
"إذا أردت أن تعرف عند الله مقامك ، فانظر أين أقامك" !!
بقيت حاسس بكمية خذلان وحرمان وألم فوق الوصف !!
ببص في موبيلي لقيت كمية رسايل من الأحباب طالبين مني الدعاء ! كلهم فاكرينني قمت الليل كله ، وانا مدلوق ونايم زي القتيل
فضلت في حالة من الصدمة والصمت طول اليوم بعدها !!
لكن ربنا سبحانه وتعالى برحمته ولطفه أراد يعلمني درس غالي أوي أوي !!
نزلت صليت المغرب، وطلعت أفطر في البيت
كنت عايش لوحدي ، وكنت بفطر كل يوم وأنا فاتح قناة الحكمة ، كانوا بيعرضوا على الفطار كل يوم شرح كتاب صيد الخاطر لابن الجوزي ، ويومها سمعت قصة كانت أول مرة في حياتي أسمعها
الصحابي الجليل سيدنا أبو موسى الأشعري (رضي الله عنه) وهو في فراش الموت ، كان بيقول لأولاده وهم مجتمعين حوله : يا بَنيَّ ، اذكروا صاحب الرغيف !!!
قالوا : يا أبانا ، ومن صاحب الرغيف ؟؟؟
القصة ببساطة بتحكي عن راهب من رهبان بني إسرائيل ، كان معتزل الناس وقاعد يعبد ربنا (70 سنة) في صومعة بعيدة في الصحراء ، وكان بينزل البلد مرة كل شهر يجيب لنفسه أكل ويرجع !
في مرة وهو نازل - الشيطان أغراه يبص على واحدة جميلة ، الست لحست عقله مشي وراها لحد ما بات معاها في الحرام سبع ليالي !!!https://t.me/Marem2014
وفجأة فاق من غفلته ، ومن كتر الصدمة طلع يجري في الصحراء ، وكان كل ما يمشي خطوة ينزل يسجد لله سجدة !! فضل كده لحد ما الشمس غابت وكان هيموت من التعب ، فلقى بيت صغير من الخشب فيه 12 مسكين قاعدين فيه ، راح رامي نفسه وسطيهم !!
وكان فيه راهب بيعدي كل ليلة يدي 12 رغيف للـ 12 مسكين دول !!
جه الراهب باليل دخل عليهم ورمى رغيف لكل واحد ، وكان الراجل ده وسطيهم ميت من التعب والجوع ، فأخد رغيف منهم !!
لما الراهب خلص ، واحد من المساكين ناداه وقال : انا ماخدتش الرغيف بتاعي !!!
فالراهب قال له : كذاب ، أنا عاددهم 12 رغيف ، ووزعت على كل واحد فيكم رغيف !!
116 views10:35