2023-04-16 14:59:08
حاواوا بقدر الإمكان ما تركزوا على متابعة الحاصل الآن في السودان ، وإذا مصرين تتابعوا حاولوا وازنوا بين رغبتكم في معرفة الحاصل وبين تقديم الدعم النفسي اللازم لنفسياتكم .
تقديم الدعم لنفسكم ممكن يشمل " قراءة حاجة مريحة ، الإستماع لشيء محبب ، محادثة مريحة مع شخص إنت مرتاح ليه .. الخ "
( ياريت وإنتم في البيت تحاولوا تقعدوا مع بعض وتتكلموا مع بعض في شكل قروب ده حايعزز من مناعتكم النفسية وحايهدئ من روعكم )
لو في زول في البيت مقلق/خائف من الحاصل الآن ، حاولوا طمنوه وقدموا ليه الدعم اللي هو محتاج ليه " وأهم شيء ما تكذبوا عليه ، وما تحاولوا تتصرفوا بطريقة غير الطريقة اللي إنتم متعودين عليها في التعامل معاه "
وأهم شيء " إختاروا أماكن آمنة للجلوس فيها ، وبإذن الله فترة وهاتعدي زي ما عدت الفترات الغيرها "
إذا في زول أظهر سلوك قلق ( كورك مثلا/بكي بشكل هستيري .. الخ) ما تشاكلوه ولا تعنفوه خالص لأن الزول ده ما بهظر ، وإتقبلوا إن دي ردة فعله إتجاه الحصل، وحاولوا إتعاملوا معاه بشكل صادق ، وقدموا ليه التطمين اللي هو محتاجه ، وما أنسى " الحضن أفضل مطمئن للنفس الإنسانية "
وراعوا بعين الإعتبار ، إن ما كل شيء بتشوفوه في التلفزيون/السوشيال ميديا حقيقي ، في حرب نفسية مستخدمة على مستوى التلفزيون لي صالح منو مامعروف ، علشان يروعوا أمنكم وراحتكم النفسية .
عاوز تتابع الحاصل ، يكفي إنك كل ساعتين_ثلاثة تمشي تكشف للحاصل من التلفزيون ، لأن في الفترة دي بالتحديد " الأخبار اللي حاتتعرض حايكون تم التأكد من صحتها "
وأدعوا يا أخوانا ؛ بالدعاء بتتحل العقد ، وبتستجاب الطلبات ، وبتمنع المصائب .
( وإياكم تحاولوا تشاركوا الأخبار اللي بتسمعوها عن الوضع الحاصل مالم تتأكدوا من صحتها ، وياريت نبتعد عن نشر الصور والفيديوهات ، لأن ما كل الأشخاص حايقدروا يتعاملوا مع الحاجات دي زي ما قدرت إنت تتعامل معاها )
# عبدالله سايكو
53 viewsNosiba, 11:59