هواي نسمع بمصطلح (بينك ) Ping خصوصا بعالم الالعاب الفيديوي الا | Mohammed Eydan
هواي نسمع بمصطلح (بينك ) Ping خصوصا بعالم الالعاب الفيديوي الاونلاين مثل بوبجي او كول ديوتي او باتلفيلد .. الخ وحتى من نريد نشترك بالانترنت نسمع من المجهز بأن الداونلود والابلود كذا والبينك كذا ! بس شنو يقصدون بي ؟ لنفترض تلعب بوبجي بالموبايل وحركت لاعبك بالاتجاه اليمين عن طريق الضغط على الشاشة ، هنا شكد وقت يستغرق حتى السيرفر الي عليه اللعبة يستجيب ويحرك اللاعب بالاتجاه الايمن ! هذا الوقت المستغرق يقاس بالملي ثانية و نسميه ping وبالتالي كلما يكون قليل تكون الاستجابة اسرع واللعبة احلى . طيب هنا السؤال على شنو يعتمد ping؟ او شنو العوامل الي تأثر على زيادته او نقصانه ؟ اول شي يعتمد على المسافة بينك وبين السيرفر مثلا اذا السيرفر موجود بكندا واللاعب بالعراق ، للعلم غالبية شركات الالعاب عندها مراكز بيانات موزعتها على القارات ، وكذلك حتى مواصفات السيرفر المستضيف للعبة. ثانيا يعتمد على الشبكة وشكد تسمح للترفك (حجم البيانات الي تتحرك بالشبكة بوقت واحد ) بيها وهذي تعتمد على مزود خدمة الانترنت وبنيته التحتية الخاصة بالشبكة . وثالثا ايضا ping يعتمد على نوع اللعبة وبرمجتها . بالاضافة بعض الالعاب تتطلب وقت مستغرق جدا قليل وضمن نطاق معين مثلا ١٥- ٤٥ ملي ثانية ولعبة اخرى تسمح بوقت اعلى وهكذا.
