قصائد استشهاد الامام الكاظم عليه السلام قصيدة( معشوق السجن) ***** سيدي يابو الرضا ابطامورة الرشيـد امكبّل واربطعش عام انگضن وحيد ولاهلك چنت من تِحن تبچي وتبچي السجن…. يبن جعفر ****** بينك وبين السجن عِشره طويله من حياتك چنت ترسم بيهْ كلما تمُر ليلـــــه ذكريــــاتك چان من يشتد الاولادك حَنينك تِون ويون السجن ويّه ونينـــك يالمبچي بالسجن جدرانه يالغريب لا أهل حِضرَت إلك لا صاحب وحبيـب حگك چنت من توِن تبچي وتبچّي السجن….. يبن جعفر *********** گاع سجنك تبچي چانت وي سجودك ايهزهه صوتك وحين تدعي ادموع تتفايض قيــودك وي قنــــــوتك چان سجنك يخشع ابلهجة دعائك وچان يدعي بيهْ يتخلّد بقائــك ابسجدتك ياسيّدي وترتيلك ودُعاك اشچنت تقره وتندعي وهيچ السجن هواك يالدمعتك عالجفن تبچي وتبچي السجن… يبن جعفر ******* انته بس انته الصرت معشوق سجنك يبن جعفـــر ايخاف سجنك لو تعنّه وسأل عَنّـــــك شخص بالبر بيك متمسّك يبو ابراهيم شوفــه مايريدك هالسجن تمشي وتعوفه مَسْمَعِت گبلك ولا بَعْدك إجه سجين سِجْنه راده للأبد يبقه مَعاه رَهيــن بس انته چِنْت ابحزِن تبچي وتبچّي السجن… يبن جعفر ***** فقط بس سجنك عرف معنى مصابك واغترابــك لأن بس هوّه النظر محنـــة عذابــــك حَد غيابـك يالذي بس السجن أصبح قرينـك وچان بس هُوّه على اهمومك يعينك عايَشك هذا السجن بالمحنّه والمُصاب وشاركك بالنايبه والوحشه والعـــذاب اتخُف عنّك الوحشه مِن تبچي وتبجّي السجِـن… يبن جعفر ******* السجن حين ابسَم يموسى ذاب چبدك شعر بالسّم وثبت موت السجن لَمّن متت بَعــــدك مِن تهــــدّم السجن مِن عاين على اجنازتك راحت هِوى سگفه الموتك وحيطانه طاحـت إنته أوّل مُعتقل من حضرته الوفاة سجنه مَتحمّل أبد ويّه مماته مات حتى ابدفنتك أظِن تبچي وتبچي السجن… يبن جعفر ******** كلمات خادم اهل البيت( عليهم السلام) الشاعر-مهند قاسم الكاظمي 1.1K viewsمهند قاسم الكاظمي, 12:45
