قصائد استشهاد الامام الكاظم عليه السلام قصيدة(باب الحاجات) *** يم گبرك جينه بهالليله ياباب الحاجات ومثلك يابِن جعفَر نصرخ للذلَّه هيهات الك نحضر يبِن جعفـر——ياباب الحاجات ******* مشايه وازحوف وركض هوسه ابأثرهه هوســه هالخَلَگ مِن كِل الدول حِضرَت الك ياموسه للحضره توصل لاهفه اتكض الضريح اتبوسه وكل المجاميـع الإجَت بوْلايتك محروسه چم شايب مايگدر يمشي وچم عاجز مشلول گوَّمته ابجاهك والعالَم بيك اصبح مذهول غِدَه امحيَّر يبِن جعفَــر——ياباب الحاجات ******** معروفه ليصيبه مَرَض يگصد لَعِد دكتوره وينطيهْ وصفه امن الدوه متضحه هاي الصوره واحنه عكس كِل هالبَشَر شخصك فقط لِنْزوره وتنزاح مِن عدنه العِلَل مِن گبرك ومِن نوره نتشافه ابسرعه لضريحك بس نتعنَّه انزور صَحنَك مستشفى وكِل عِلَّه إلهه انته الدكتور طبيب البَر يبِن جعفـر ——ياباب الحاجات ******** چم خَرسه واشچم عاجِزَه يمَّك حِچَت واتشافَت وچم حادثه وچم مُعجزه يَمَّك الوادِم شافَت اتعنَّت إجَت وصلت إلَك مِن كِل غَدِر ماخافَت وصارت تِحج ابحضرتك واعله ضريحك طافَت مثل الحِجَّاج اعله اضريحَك صارت هالزوَّار ماتهتم الأي إرهابي وماتعرف الاخطار ولَو فَجَّـــر يبن جعفر——ياباب الحاجات ****** متعجِّبه اعقول الغَرِب والشَرِق كِلْهه ابشخصَك ابيا منزله رب العرش فضَّلَك هُوَّه وخَصَّك متأيِّد ابروح القدس والعلي العالي امرخصك تنطي الحوايج للبشر تنشر عليهم حرصك تِحْرِص مَتْخيْب اليتعنَّه ومَتْرِد أي مِحتاج والكون أصبَح يابو طِلْبَه من نورك وَهَّاج وبُگه يزهَر يبِن جعفَر——ياباب الحاجات ******* خَل ينظر اعليك الزَمَن خَلْ تِصِد ليك اعيونه وايشوف وين انته صِرِت وين النذل هارونه گبرك مناير أربعه شايلهن اعله امتونــه وگبتينك اعليهن بُگه الذهب يلمع لونه ين الطاغي وقصره الشامخ دلوني ابهارون لامِن گبره لامِن عَرشه موجود ابهالكون گِضَه اويه الشَر يبِــــــــن جعفَر——ياباب الحاجات ******* وآخِر كلامي سيِّدي ينتهي اوياك ابدمعه اتعنيت الك يابو الرضا وضاگت عليَّه الوسعه كِلَّك كَرَم واليگصدك مَتْخِيِّبَه ومَتْرَجْعه طالب الثار ارد افتهم يمته تِصِحْلَه الطلعه مسجونين وصبر الغيبه صار النه الزنزان چم يوم العَدَّه وچم ليله والغايب مابان مَتَه يظهَـر يبِن جَعْفَر——ياباب الحاجات ******** كلمات خادم اهل البيت (عليهم السلام) الشاعر مهند قاسم الكاظمي 2.0K viewsمهند قاسم الكاظمي, 12:47
