(محلوله) **** المصيبه تريد واحد كَلِف ويحلهه وابو طلبه كفو امن اتميل يعدلهه ***** لاتنهار لا تيأس ولا تحتار ابو اربع مناير روحله خطار كفو مِنَّه چريم وفتح باب الدار ويلگه العون كلمن بابه يدخلهه ***** لاتلتفت وامشي ثابت الخطوات ولاتهتم ابد لمگاطف الشِمَّات اهدئ واطمئن يم قاضي الحاجات ذبهه ابحضرته وهوّه ايتكفلهه **** خل تطفه جمرتك لاتظل تسعر وكل اقيود همَّك خلهه تتكسَّر بس گلَّه مدد ياموسى ابن جعفر وشوف اشلون تنفض شدَّتك كِلهه **** زمان المعجزه لاتظن فات وراح موسى انخاه البابك تلگه الف مفتاح احچيله الإمامَك گِلَّه مارتاح آنه ابصايتَك واحوالي بَدلهه **** عليمن مرتبك خل ينمحي خوفَك لتصدَّگ الكاظِم طايح ايعوفك فجأه ولَن تشوفه اتناوش اچفوفك ويطَلْعَك مِن الحفره وماترد إلهه ***** عيش وشوف واتذكَّر احچاياتي أنه عن تجربه سَطَّرت چلماتي چنت حاسبهه صعبه وگضَت حاجاتي وكل الزود للكاظم السهَّلهه ***** كلمات خادم اهل البيت(عليهم السلام) الشاعر مُهند قاسم الكاظمي 2.8K viewsمهند قاسم الكاظمي, 12:48
