ما بعد ٧ أيام تعافي : السلام عليكم يا أبطال ياالله والله ح | بُشريات أبطال واعي
ما بعد ٧ أيام تعافي :
السلام عليكم يا أبطال ياالله والله حاسس اني بحلم من فتره موصلتش لأسبوع كامل بعادات والتزام من فتره وبدون أي زلات ولله الحمد ومبسوط ومرتاح نفسيا بالقرب من الله والبعد عن هذا الادمان البغيض وحاسس اني بقيت فايق مش متخدر ومجرد جسم حاضر لا في عقل وروح بدأت ترجع
صراحة الطريق مكنش سهل ومتعب اوي اوي ومحتاج صبر وعمل وعمل وعمل مش مجرد نوايا جيده وتمنيات واحلام وانا خلال الكام يوم اللي فاتوا اتعرضت لاعراض انسحاب صعبه منها الصداع والارق والملل والنوم الكتير وغياب الحافز وشهوه عاليه اوقات وكسل شديد بس مجرد ماكنت بحس بكده بحاول اخرج من المود ده واتحرك علطول مش مهم تبقي بيرفكت وتخلص كل حاجه ولكن المهم تستمر وتجاهد " قليل دائم خير من كثير منقطع "
نصيحتي للشباب اللي بيحاول بقاله فتره وانا كنت كده بجاهد بقالي تلت سنين وكان اكبر مده ٣٥ يوم انك تصبر وتصحح يعني كل ما تقع فيه اكيد اكيد مدخل وقعك بس هو انت بتتغافل عشان بيكون صعب عليك تقفله زي مثلا الفيس بتخاف تمسحه او حته تحدد له وقت او تلغي متابعتك للي بيثير شهوتك وهكذا من حاجات كتير ودايما كل ما تيجي علي نفسك وتعمل عكس اللي نفسك الاماره بالسوء تقولك عليه ربنا هيكرمك وهييأيدك وينصرك وحاجه تانيه برده بشوفها مهمه اوي وبتفرق علي مستوي العادات انك تحاول تكسر منطقة الراحه بتاعتك" comfort zone " بانك تبدا تعمل حاجات عمرك ما عملتها لانك بتكسل او بتخاف تعملها عمرك ما جريت ولعب رياضه ابدأ اشترك في الجيم وارمي نفسك في الحاجه عمرك ما خدت دش ساقع ارمي نفسك تحته تجربه لا اتمناها لالد أعدائي عمرك ما دخلت جمعيات تطوعيه وبتخاف من الاجتماعيات اشترك في جمعيه خيريه عمرك ما ذاكرت بره البيت أو مع حد جرب تذاكر مع صاحبك او مع اخواتك او في work space بحيث متختليش بنفسك وتزل وهكذا بقي
وإياك انك تيأس بعد انتكاسه لان ده هدف الشيطان ولكن اندم والندم توبه وندمك بأنك تتحرك مش تجلد ذاتك وتقعد تبكي فقط لا ازعل واضايق بس لازم فعل بعدها بأنك تغتسل فورا وتصلي ركعتين توبه وتطلع صدقه مثلا وتقفل طريق الزلة وتكمل يومك عادي صعبه بس انت راجل وقدها وده بيبقي افضل وقت تاخد فيه قرارات صعبه لأنك بتكون في أشد اوقات الكسره وقلة الحيله وصدقني مجرد ما تعمل كده هتلاقي ربنا بيفتحلك سبل التعافي بس واحده واحده وقوي علاقتك بربنا وبعباداتك والرياضه من أهم وسائل التعافي اللي بتساعد كتير خاصه اول فتره وبتقلل من حده الاعراض الانسحابيه واخيرا ادعوا الله بأن يحبب إلينا الإيمان ويزينه في قلوبنا ويكره إلينا الكفر والفسوق والعصيان
