شهادة امير المؤمنين ع اخر ' يوم اوياه باجر ' ما نلكاه حيدر ' | الشاعر ميثاق الحمداني

شهادة امير المؤمنين ع

اخر ' يوم اوياه
باجر ' ما نلكاه
حيدر ' مطبور الهامه
حيدر ' بالباب ايتامه
حيدر ' اخر ايامه
وا ويلاه
......
1
انطبر راسه علي والليل عوزه الثام
بعد ما مر منگب يفگد الايتام
تعبنه مناطر و واحدنه ابد ما نام
فگدنه القاسمه الله من ثلثتيام

يم الروازين ' نسهر بقينه
تانينه ابو حسين ' حدما غفينه

ننطر ' راعي نگاب
ننطر ' دگة باب
الغالي ‘ ما مر خدامه
الغالي ' نعرفه امن الثامه
حيدر ' اخر ايامه
وا ويلاه

......
2
وصلنه لباب حيدر نهل ماي العين
إيليا شي يگول وشي يبو الحسنين
من دگينه بابه طلع يبجي حسين
گلناله علي وضل يصفك الچفين

گال النه حيدر ' گلبه عليكم
مطبور راسه ' ورايد يجيكم

يگلكم ‘ نور العين
يگلكم ‘ مشتاگين
واحنه ' الشبّعنه اكرامه
واحنه ' اشتاگينه إحرامه
حيدر ' اخر ايامه
واه ويلاه
......
3
امن اتعنينه بيته بهمنه والاهات
سمعنه ام الخدر تبچي وتجر ونات
وشفنه الحسن يحفر بيده والدمعات
طيور الإوز گال امن البچي ميتات

دمع الحسن صاح ' وگليبه صايح
الباب اللزم بيه ' تلگونه طايح

كلشي ' يون اعليه
كلشي ' حاير بيه
جينه ' وننحب گدامه
جينه ' وقبّلنه الهامه
حيدر ' اخر ايامه
واه ويلاه
......
4
انطبر راسه ودمعنه بالطريق متاع
واحدنه يذوب بدونه حدما ضاع
اجينه باللبن حتى يطيب بساع
گالوا مات وتبدّه اللبن عالگاع

ويلاه ذبلنه ' بمصابه ياسه
اركضنه لحجرته ' وبچانه راسه

شفنه ' دم الراس
شفنه ' يون عباس
الوالي ' مكسور القامه
الوالي ' ينعاه صيامه
حيدر ' اخر ايامه
واه ويلاه
......
5
اجينه نشوفه ردينه بدون اعيون
الله يعين زينب هسه بيها شلون
باچر عيد والطبروا علي يشمتون
واهل البيت وسط المقبره يعيدون

والله مصيبه ' زينب جفوها
وسط المقابر ' امها وابوها

زينب ' وين تروح
زينب ' كلها جروح
تبچي ' وضلت محتامه
تبچي ' الاظلم متنامه
حيدر ' اخر ايامه
واه ويلاه

#ميثاق_الحمداني