مصداقيتي وياك الدمع اليصب لان هوه الدمع اول ضحاية الحب شغلتني | الشاعر مصطفى البديري

مصداقيتي وياك الدمع اليصب
لان هوه الدمع اول ضحاية الحب
شغلتني الحياة ومن سمعت الصوت
جبت كلبي واجيتك من غياب الجُب

بقيت اني وشجوني .. وحسرتي الكربلاء
متت بيك وعيوني .. على قيد البكاء
صحت يا دمعة كوني .. رخيصة ابكل عزاء

الما يخصك مايخصني ومو مهم
واليهمني ابمجلسك كون انلچم
السالفة ومابيهه ترجع للضمير
اليفتهم جرحك بعد لا يفتهم
***********************ا
اطشر ضياع وبيك ارد ألتم
وادعي الباري يومية ابدمع مهتم
خلصني وأخلصني الى المذبوح
يالمخلص اللبن من بين فرث ودم

الما يعرف مصيرة .. ألك بجروحه باب
والسالم ضميرة .. يحبك عل العذاب
ستر واطاني غيرة .. ودمع حرگة ومصاب


البارد الغيرك جمر صاير عليك
فالت ايدي امن امي واملزم بديك
هية مو قصة أكون اولا أكون
حته لو تطردني يامولاي اجيك
*************************ا
مادام النفس بية الدموع اتهل
عن هذا النهج لابطل ولا زل
اذا ذلة خدمتك حاسبيهه الغير
اللهم لا تحرمني من الذل

شرف للبي حمية .. خدمتك ياحسين
وجروح الغاضرية .. ابرگبتي تبقة دين
عله غربة رقيه .. وسبيهه انطيني عين

الراحت ابدرب اليسر مدمعهه حار
زغيرة چانت والمشي ايتعب الكبار
مچتفة وممشة الهزل رايدله حيل
ويمشن ابضعنك بقن ليل ونهار
***********************ا
مو ذكرى ويمر جرحك ابأي انسان
اذا عل الذكرى مرات الذكر نسيان
مابدل كلامي وياك يامولاي
انه العبد اليحبك من كلب واللسان

اتبعك عن دراية .. واهيم ابكلشي بيك
ما جابتني غاية .. خذاني الحب عليك
يضامي النهر مايه ..عطشتة الحد اديك

عل الخدر واهل الخدر كلبك حريص
ومن رميت الماي بيَنت الرخيص
راودك عنه وچنت ضامي علي
ودرت وجهك عنه وانقد القميص
*********************ا
ياريت العمر ما يمشي يامولاي
حته ابكل وكت جرحك يظل وياي
يالعندك ضعن رايح سبي للشام
وضعنك مو مثل ما راح عنك جاي

بلا راية الضعينة .. مشت عن كربلاء
طافت چم مدينة .. عفيفات النساء
سبي واختك حزينة .. بچت ليهه السماء

كربلة سلمت ضعنك للسبي
ابدرب مايعرف شنو شيمة نبي
بت امير الكون عافت كربلاء
أبناگة هزله والحده بيهه اجنبي
*******************ا
الشاعر
مصطفى البديري