2023-03-24 21:00:06
راح اجاوب على اسالتكم هنا
س١ / اني جاي أقره واتعب بس بالامتحان الشهري ما احصل درجه شنو الحل؟؟؟
ج١ / حبيبي يكولون الإنسان عنده عقل و ذاكره مو رام ماتكدر تخزن فد شي من اول مره لازم يتكرر عليها ياله تحفظه وبعد ماينسي المهم انته من تمتحن شهري بالماده تره يجوز قاريها مره او مرتين بعدهي المعلومه مامختمره بدماغك واجيت تبجي ماحصلت درجه ودرجاتي بالشهري مو زينه وإحباط ومتحطم هووب هووب يمعود / يمعوده تره بسم الله توك طبيت مرحلةجديدة خلي عندك ثقه بنفسك ولتخلي الدرجه تحبط معنوياتك.
س٢ / اكلك شنو القرايه اللي تنصحني بيها وبيها اكدر اضبط المواد؟؟؟
ج٢ / عمري أهم شي اليومي أقره الدرس بدرسه لاتفوتلك كلمه حاول أن تقره بتركيز وع راحتك بدون ضغط بدون تعصب بدون تململ حب المواد اعشق مرحلتك خلي حبيبك علمود ماتمل منه وراح تضبطه وتنعل والدي لحبيبك .
س٣ / مرات أقره بس تتعب نفسيتي واضل ما افهم الماده شلون بهاي الحاله؟؟؟
ج٣ / حبي اشمر الملازم كوم ناملك ساعه اكعد اسبح أرتاحلك شويه مثلا شي تحب تشوفه ترتاح نفسياً ارجع وراها للملازم راح تقره وتحفظ بسرعه لأن إذا تعبت نفسيتك وبقيت لاطش ع الملازم كلشي ماراح تستفاد وراح يصيبك الإحباط يتراوالك/ج الماده صعبه بس غلط انته عقلك قفل بعد ميستقبل اي شي حتلو سهل نوم+سبح+راحه ساعه ونص راح ترتاح وتقره ٦ ساعات وانته مرتاح وتسحب وتركز صح.
س٤ / عود ليش اني بالبيت احل الاسئله كلها من يجي الامتحان أضل اخربط بالشهريات؟؟؟
ج٤ / حياتي تره بالبيت حاطهن كدامك وشي وره شي والقوانين توك قاريهن والأفكار متسلسله لذلك تحل اي سؤال بس بالامتحان راح يجنك اسئله متفاوته شي من البدايه شي من الاخير ضغط الامتحان الظروف الأجواء تختلف لذلك هذا الشي طبيعي راح تتعود علي وراح تكتسب الثقه يوم بعد يوم وامتحان لامتحان راح تتعود ومنا للوزاري انته هذا الشي عابره وصاير عدك عادي كلش وراح تمتحن وانته مرتاح ومسيطر ع الاسئله لأن كلها ماره عليك الأجواء.
س٥ / زين عود انته مسيطر وتجاوب ع الاسئله دجاوبني ع هذا السؤال
ليش اكو ولد / بنات يحصلن درجات عاليه واني ما احصل اني هيج انقهر اتحطم يلا جاوب؟؟؟؟
ج٥ / هاااا خوش سؤال
تدري ليش اول شغله ذاكرته ظروفه أهله موفريله كافة مستلزمات الدراسه، ثاني شغله مدرسينه طريقة دراسته.. ماقنعتني زين اني شبيه حبيبي انته أولاً انته مادامك تفكر بالدرجات مال الشهري شغلتك عاويه فدوه اروحلك هاي السالفه مالت الدرجات اتركها ماتفيد انته خلي همك واهتمامك تضبط الماده شلون أقره يومي واتعب ع اليومي وعوف الشهري أهم شي تضبط باليومي وهاهيه.. هاا شتكول، اي والله هم صحيح مو مهمه الدرجات أهم شي الوزاري.. عفيه وكما قال الشوالي العبره بالخواتيم يا أصدقائي.
س٦ / زين بس آخر سؤال شلون أقره الماده بحيث اضبطها كلش؟؟؟
ج٦ / اني اكلك شوف عيني اي واحد يجاوبك تره يظل ينعثل عليك وحته اني تدري وين تروح احسن واحد ينصحك هوه المدرس مالت الماده مثلاً الأحياء روح لابو الأحياء هوه ينطيك طريقه، ابو الكيمياء كذلك وكذا بقية الدروس.
صير بطل لاتهزك الهزايز انته معركتك وي السادس او ثالث انته كون تعدلها العده واحنه وياك منا ليوم الامتحان والله وأهل البيت ع وياك بالامتحان جا بعد شتريد انطلقوا
#سنبقى_معكم_احبتي
#ايــــــــــــــــــــــــهاب
• للقنوات لا احلل نقـل اي حرف بدون رابـط القناة وغير مبري الذمة بدون رابط القناة .
• t.me/Mydream19
788 viewsايــــــهاب جــــمعة, 18:00