مقاومة الإنسولين وخداع النفس عندنا #مثل_شعبي قديم بيقول: يا | صحتي هي حياتي
مقاومة الإنسولين وخداع النفس
عندنا #مثل_شعبي قديم بيقول: يا بخت من بكاني وبكى عليا ، ولا ضحكني وضحك الناس عليا سكر النوع الثاني في كل #المراجع_الطبية تعريفه هو (مقاومة الإنسولين) لأن مرض السكر إما سكر نوع أول ، وده جسم العيان فيه مش بينتج إنسولين أصلا ، أو سكر نوع تاني ، وده فيه جسم العيان بينتج إنسولين، وممكن يكون بينتجه زيادة عن الطبيعي كمان ، لكن جسمه مش عارف يستفيد منه بالشكل الطبيعي فبقى كأنه مش موجود
يعني ببساطة #سكر_النوع_الثاني هو نفسه مقاومة الإنسولين، ومرحلة ما قبل السكر اللي احنا مسميينها كده #جبر_خواطر وعلشان أصحابها ميتصدموش وميزعلوش ، تسميتها الصحيحة هي مرحلة ما قبل ظهور أعراض السكر السكر موجود فعلا ولكن أعراضه لسه مظهرتش
الست بتبقى #حامل أول ما الحيوان المنوي يخصب البويضة وتتكون #النطفة وتنغرس في جدار الرحم ، مش لازم ننتظر لما الجنين يكبر وبطنها تبقى متر قدامها علشان نعتبرها حامل أهو لما بنقول لمريض مقاومة الإنسولين إنت في مرحلة #ماقبل_السكر، احنا بنعمل كده بالظبط
وبتكون النتيجة مش إن المريض بيلحق نفسه و(يجهض الجنين) قبل ما تظهر #أعراض_السكر ، لأ اللي بيحصل إن المريض بيقول لنفسه تمام ، يعني أنا لسه معنديش سكر ولا حاجة أنا تمام فخلاص بقى ابقى اخس وانظم أكلي إن شاء الله وميجيليش سكر ولا حاجة إن شاء الله وإن شاء الله عندنا ديييييما معناها غلط هي معناها إني اعمل اللي عليا والتوفيق من عند ربنا ، لكن عندنا احنا معناها #المماطلة_والتسويف وتأجيل عمل اليوم مش للغد وبس ده لآخر العمر لدرجة ان كلنا عارفين إنك لما تطلب من حد حاجة ويقولك إن شاء الله، بتفهم ضمنيا كده إنه مش ناوي يعملها أصلا
وطبعا نتيجة ده عدد #مرضى_السكر كل يوم بيزيد ، لأن واقع الأمر إن نسبة كبيرة جدا مننا من أول الأطفال وطالع ، عندنا سكر لكن أعراضه لسه مظهرتش فاحنا بننتظر لما أعراضه تظهر وهنا نقول إن الشخص بقى مريض سكر
ركزوا كده في #أعراض_مقاومة_الإنسولين وانتوا هتفهموا لوحدكم الخمول وفقدان الطاقة. #الجوع_المستمر. النعاس والإجهاد وخاصة بعد تناول الطعام. سهولة زيادة الوزن وصعوبة فقدانه. ارتفاع #الدهون_الثلاثية في الدم. ضبابية الدماغ(فقدان التركيز). سمنة البطن(الكرش)، وهنا الكرش سبب ونتيجة في وقت واحد. #الاكتئاب وسوء المزاج بدون أسباب واضحة. سواد مناطق من الجلد زي خلف الرقبة(القفا) وتحت الإبطين، وده عرض أكيد لمقاومة الإنسولين. #تكيس_المبايض وده برضه عرض أكيد. ضعف القدرة والرغبة الجنسية عند الجنسين. ضعف المناعة وسهولة العدوى وبطء شفائها. #تأخر_البلوغ عند الجنسين. ها، عند حضرتك كام عرض من دول
طيب أزيدك من الشعر بيت مريض مقاومة الإنسولين مفروض يتعامل كأنه #مريض_سكر بالظبط ، وده هو علاجه اللي يمنع إنه تظهر عنده أعراض السكر ومضاعفاته
يعني لازم ينزل وزنه الزايد للوزن المثالي تماااما ، يمارس رياضة يومية لمدة لا تقل عن نص ساعة ولو زادت لساعة يبقى أحسن ، ياكل أطعمة صحية وينظم مواعيد وجباته، ينام سبع ساعات على الأقل ويكونوا بالليل ما بين #الغروب و #الفجر.
يا جماعة مقاومة الإنسولين هي سكر نوع ثاني بدون أعراض ، ولو استمرت بتسبب نفس #مضاعفات_السكر المعروفة للجميع . كلنا نظامنا الغذائي غلط ونظام حياتنا على بعضه غلط ، وعلشان كده بقينا كلنا مهددين بظهور أعراض السكر في أي وقت سكر النوع التاني مبيحصلش فجأة ، مريض السكر ممكن يكون بقاله سنين عنده سكر وهو مش عارف ، لأن بقاله سنين عنده #مقاومة_إنسولين وهو مش عارف
خالص تمنياتنا للجميع بدوام الصحة والعافية ولجميع المرضى بالشفاء العاجل .
#دكتور_كشكول #روشتة_دكتور_كشكول
دكتور كشكول توعية طبية لكافة فئات المجتمع اول موقع طبي كرتوني في الشرق الاوسط أول صفحة طبية باللغة العامية
