2022-09-01 21:19:00
الجزء السادس
#أنوثتي_مأساة_شكسبيرية
أنوثتي مأساة شكسبيرية
للكاتبة روز سعد الدين
كاتيا : سربريز !!
عامر : كاتيا !
كاتيا : اي جيت لاعملك مفاجأة ! شو ما انبسطت بشوفتي ؟
بان الارتباك على ملامح وشو مباشرة
عامر : ااكيد ، انبسطت
ما كنت متوقع جيتك ، لانو ما بذكر خبرتك عن بيتي هاد !
كاتيا : شو يعني ما كنت ناوي تخبرني
عامر : ااه … اي اكيد كنت ناوي
كاتيا : من مبارح عم دقلك ما عم ترد ، اضطريت اتصل بامك و هي خبرتني عن مكانك
عامر : اها امي لكن !
كاتيا : عامر شبك ! مو معقول انت ،ما رح تقلي تفضلي !
و قبل ما تنهي جملتا ، دفشت الباب و فاتت ، عامر كان مصدوم ، و ما لحق يحكي معا شي ، دخلت على الصالون بدون استئذان و لمحت جاكيت احمر نسائي على الارض ، انحنت بقواما الممشوق و تناولتو عن الارض ، كان عامر بعدو فايت وراها ، و شافا لمن اخدت الجاكيت ، التفتت عليه هي و عم تتسائل عن صاحبتو
كاتيا : هاد اكيد مو الك ؟!
عامر : لا هاد …. هاد …. انا
بلع عامر ريقو بصعوبة ، هوي و عم يفكر بشي كذبة مقنعة ، لكن باغتو صوت زينة هي و عم تنادي عليه من الغرفة لتسألو وين حاطط مسكن الالام
كاتيا : مين عندك جوا
عامر : كاتيا ، لو سمحتي اطلعي هلا و بنحكي بعدين
كاتيا : لا ماني طالعة
مشت كاتيا باتجاه مصدر الصوت ، حاول عامر يمنعا ، لكنا كانت مصممة تعرف
عامر : كاتيا ارجعي لهون
تابعت مسيرا و ما ردت عليه ، فتحت باب الغرفة ، و شافت زينة هي و عم تشلح تيابا و تلبس بيجامتا
كاتيا : انتي شو عم تعملي هون !
زينة : ……
صدمة زينة ما كانت اقل من صدمة كاتيا ، تنيناتن تفاجئو ببعض
كاتيا : عرفتك ! انتي اللي كنتي بمحل الدهب هداك اليوم
شو انك وحدة رخيصة !!!
زينة : انتي فهمانة غلط !
وصل عامر على الغرفة و حاول يطالع كاتيا لبرا حتى ما يصير صدام بينن
عامر : كاتيا رجاءًا اطلعي ، و خليني اشرحلك
كاتيا : ما رح اطلع ! انا هلا بدي اعرف هاي شو عم تعمل بغرفة نومك !
زينة : انا بس ….
و قبل ما تكمل جملتا كانت كاتيا هاجمة عليها و مبلشة فيها ضرب
كاتيا : وحدة فلتانة ما بتستحي
زينة : بعدي عني انا ما خصني
كان عامر يحاول يبعدن عن بعض ، لكن كاتيا كانت معصبة كتير و عم تدفش بكل الاتجاهات و تضرب ، اما زينة كانت عم تحاول تخلص حالا باي طريقة
عامر : كاتيا خلص !
كاتيا : لسا بدي ربيها لهالحقيرة
اضطر عامر يستخدم العنف حتى يوقف هالمهزلة ، حمل كاتيا غصبا عنا و ثبتلا ايديها بالقوة ، حاولت ترافس برجليها لتتحرر من قبضتو بس ما قدرت
عامر : خلصنااا
قالها عامر بصراخ ، تجمدت كاتيا بمكانا ، كانت اول مرة بتسمع هالنبرة بصوتو، اما زينة فاستغلت الموقف لتنفد بجلدا ، تناولت تليفونا و جزدانا ، لبست شحاطة عن الباب و هربت لبرا
كاتيا : لوين هربانة ارجعي !
بعد ما تطمن عامر بانو زينة طلعت لبرا ، فلت كاتيا
عامر : شو هاد اللي عملتيه ؟!
كاتيا : والله انا اللي لازم اسالك هاد السوال
عامر : يعني انتي شايفة هاد التصرف بليق فيكي ؟
كاتيا : ما تكون غلطان و تطلع بالعالي ! جايب بنت على بيتك و عم تشلح تيابا بغرفة نومك و بدك اياني كون لطيفة معا !
عامر : لا بس اساليني و انا بفهمك
كاتيا : ليكني عم اسالك ، ليش هالبنت كانت هون ؟
عامر : تمام ، رح وضح كلشي ، بس لازم تهدي شوي
كاتيا : اي
عامر : انا و انتي مرتبطين من اقل من شهر ، و انا قبل ما اخطبك كان عندي علاقاتي ، و طبعا هالشي مو من حقك تساليني عنو لانو ماضي !
كاتيا : و الماضي تبعك شو كان عم يعمل هون !
عامر : كانت واقعة بمشكلة و اضطرت تلجألي
كاتيا : و مشكلتا بتطلب منا انو تشلح تيابا بغرفتك
عامر : البنت ما عندا مكان تروح عليه ! مطرودة من سكنا الجامعي و طلبت مني تبقى عندي يومين
كاتيا : اكيد طردوها لانو عرفولا فلتانة!!
وبعدين عادي عندك تعيش معا تحت سقف واحد و انت خاطب !
عامر : ما كنت رح ضل هون ، كان بدي اقعد عند اهلي بس انتي داهمتي الشقة و احرجتيني و احرجتي حالك !
كاتيا : ……
عامر : اكيد اخدت عنك فكرة مو منيحة ! و قالت شو هالبنت المتوحشة هاي !
كاتيا : عاااامر !
عامر : بعتذر ما قصدي قول عنك هيك
كاتيا : عكلن ما بهمني شو فكرت فيني ، اصلا كلا على بعضا مو هاممتني
عامر : بس انا بهمني ! صورتك قدام الناس هي صورتي !
كاتيا : ….
سكت عامر شوي ، لمن حس الامور بلشت تتحسن و تنقلب لصالحو
عامر : صار اللي صار ، بس مرة تانية رجاءا انتبهي على تصرفاتك
كاتيا : عامر انا ….
عامر : انا لو ما كنت بحبك يا بنت ما كنت تحملت انفضح بهالشكل قدام البنت ، لو وحدة غيرك عملت هيك كنت تركتا بلحظتا
كاتيا : غلطت و تسرعت ، بس ما بعرف كيف فقدت السيطرة على اعصابي وقت شفتا عم تشلح بغرفة نومك
عامر : يمكن انا كمان غلطت ، كان لازم ساعدا بغير طريقة ، بس احرجتني !
كاتيا : ما بدي شوف هالبنت حواليك مرة تانية
32 views18:19