2021-12-16 02:21:51
ما هي تقنية الجيل الخامس 5G
احنا عندنا تقنية الاتصال اللاسلكي اللي بنستخدمها دي كل 10 سنين تقريبا بيتم عمل جيل جديد ليها.. يعني مجموعة من التعديلات والتحديثات على التقنية بحيث إنها تقدم أداء أفضل واتصال أقوى.
بداية الأجيال دي كانت في التمانينات مع ظهور الجيل الأول 1G وبعد كدة كل 10 سنين كان بيظهر الجيل الجديد، ومع وصولنا عام 2020 بفضل الله ده كان ميعاد الجيل الخامس، وبالفعل أصبحت التقنية متوفرة ومستخدمة في دول كتير.
الجديد في الجيل الخامس إنه هيعتمد على نوع مختلف من موجات التردد غير النوع الحالي.. إيه موجات التردد دي؟
البيانات اللي احنا بنبعتها لبعض دي أو أي بيانات بيتم التعامل معها إلكترونيا بيتم إرسالها على شكل موجات راديويّة، الموجات دي ليها مجال أو حيز معين بتنتقل من خلاله ومتقدرش تتجاوزه وهو 6 جيجاهرتز.
لو شوفنا دلوقتي هنلاقي تقريبا اننا بنعتمد على الموجات دي في كل حاجة (المكالمات الهاتفية، الواي فاي، البلوتوث، البث الفضائي وغيرها) كل الحاجات دي بتعتمد على الموجات الراديويّة في الانتقال.. ده خلى المجال الترددي زحمة جدا وإشارات الأجهزة والتقنيات المختلفة بتعترض بعضها وبالتالي أدائها بيبقى ضعيف وسرعات الإنترنت المحدودة مثال على المشكلة دي.
هنا بقى يجي دور تقنية الجيل الخامس اللي هتبعد تماما عن الزحمة دي كلها لأنها هتستخدم نوع مختلف من الموجات اسمه "الموجات الملّيمترية" الموجات دي المجال الترددي بتاعها أكبر بكتير من مجال النوع السابق (من 30 إلى 300 جيجاهرتز)، وكمان المجال ده يعتبر تقريبا غير مستخدم وده معناه إن انتقال الموجات فيه هيكون أسهل وأسرع وبالتالي نقدر من خلال التقنية دي إننا نحصل على إنترنت أسرع 40 مرة من الجيل السابق وسرعته هتبدأ من 1 جيجابت في الثانية
اعرف أكتر عن الجيل الخامس والإمكانيات اللي هيوفرها وعيوب ومميزات الموجات الملّيمترية من المقال البسيط ده
https://bit.ly/30ayC7j
193 views23:21