2022-06-10 01:08:42
كنت كأي شب عم يحاول يبني حياتو ويواجه مخاوفو ويحاول يوصل لأهدافو شاب طموح ومتفائل انو يوصل لوجهتو يلي رسم احلامو كلها عليها بس فجأة بيصحى هالشب على الواقع يلي عايشو وبلاقي حالو غرقان بألف مشكلة وهم بلاقي حالو هربان من بلد مليان اوجاع هربان بشوية كرامة وشوية احلام يعيش لأجلها باقي حياتو وما بلاقي حالو غير واقع بمستنقع اكبر واقذر من المستنقع يلي كان عايش فيو بلاقي حالو ببلد مستكثر عليه حتى الهوا يلي بيتنفسو ببلد بخاف فيها الشخص يرد عالمسبة بكلمة عادية يلي العيشة فيه صار أشبه بالسجن يلي هربت منو واقذر بدرجات بس الفرق اني ما راح اختفي تحت الارض ولا راح اموت برصاصة قوسها ابن كلب علي لاني ضد تفكيرو ومعتقدو بس هون عم موت قهر واكتئاب وعزلة حتى انو فكرة الانتحار صارت مقبولة وقابلة للتنفيذ لانو كل الحلول يلي حوالي صارت مميتة وقولات المثل( مثل يلي بالع الموس عالحدين)
دائماً بحاول أخبي كل هالوجع والاكتئاب والهم يلي حاملو بس احيانا بوصل لمرحلة بقول فيها بكفي لحد هون بكفي اني خايف من ردود الناس أو تعليقاتهم أو انو يسوو حالهم فهمانين حياتي أكثر مني يلي عايشها وبيعطوني حلول انا بالاساس مجربها
وعم اتخبط يمين ويسار عم احاول اني ابني حياة شبه مقبولة لحتى اقدر اتحمل ثقل هالايام يلي بطل الشخص يلاقي فيها حدا يساندو أو يوقف معو ويضطر الإنسان انو ينشر وجعو عالملأ كتلويحة يد اخيرة لغريق
بنشر هالوجع لحتى ارتاح ليوم واحد واحس انو حكيت ولو جزء من وجعي وهمي
لأميت بدي اضل خاف اقول اني سوري مو خوف على حالي بس خوف على عيلتي يلي مو قادر اقدملهم السعادة من كثر الاكتئاب يلي تمسمر بعروقي من العنصرية يلي بطرف والفقر والهم بطرف ثاني
لأميت بدي اضل خايف وهربان رغم اني مو مسوي شي غير اني سوري
يمكن يكون هالمنشور كتبتو بلحظة ضعف بس صدقوني صارت كل لحظاتي ضعف ومو قادر اكمل بحياتي هيك
ساعدو بعض ولو بكلمة لانو الواضح انو كلنا على حافة الانهيار
ويلي بيقدر يساعد غيرو ويخلي يوقف على اجريه لا يقصر لانو هالمنشور وجع كثير ناس مو بس وجعي
Wesam Alshaabin
78 views22:08