#ذات لحظة #الحلقة '1' __________ في وحدة من عمارات عائل | NOVEL • روايات
#ذات لحظة #الحلقة "1" __________ في وحدة من عمارات عائلة الزين، شقة جايطة، قام مخلوع دي منو ياربي كمان، "ماسك رأسُ" ي لله الصداع ح يفجر راسي، عاين ل البت ال نايمة جمبو دي منو انا ما متذكر اكون جبتها امبارح!!؟...... امشي الحمام احسن لي. جهز نفسُ جاب ظرف فيهو قروش وكاتب ليها 'ما عارف متفق معاك علي كم بس اظن القروش دي كفاية'. وطلع بعد نص ساعة صحيت اهاااا اا دا شنو شنوو بقيت تبكي ب طول صوتها، امشي وين انا.... لقيت روب جمبها لبستُ وبقيت تشوف زول في الشقه، لقيت شنطتها....اهاا التلفون الو.... اي ح ارسل لك عنوان تعالى لي فيه، و جيبي لي هدوم، وقول لي امي بايتة معاك.... تعالي سريع عليك لله... __________________ "فلاش باك" انا هُيام محمد، عمري ٢٦ خريجة it مدمنة حواسيب، ابوي متوفي من وانا في ثالث، امي بثينة عندها روضة، ومعاها كم بت كده مرات بتعمل اكل مناسبات، بعد وفاة ابوي الصرف كان تقيل عليها، عندي اخوي واحد أصغر مني يوسف بقرأ في الجامعه في مدني. انا مخطوبة ل ود عمتي خالد، من احنا صغار هُيام ل خالد وخالد ل هُيام، لبسنا دبل لنا تلاته سنه طول السنين دي ما حسيت ب اي مشاعر اتجاه خالد، غير ان ود عمتي. *ي بت هُيام اطلعي عشان اوصلك معاي _كويس ي امي جاية جاية، اشرب الشاي بس، و جمبك في العربية طوالي. *يلا سريع عندي مشاوير انا. _جيت جيت ي امي. *اقفلي الباب دا براحة قاعد يأكل معاك هو _حاضر، كده ي أمي افتحي المكيف. *المكيف بايظ _احيي نفسي طبعا يوم العربية ما يكون فيها مشكلة، بس على قول يوسف دي عربية مع العربات هسا *انتي ويوسف الاتنين جادحين قولوا الحمد لله، احسن من مرمطة الموصلات. _اي اي الحمد لله. صحي ي امي قبل انسى بعد الكورس، عندنا عرس يوم الجمعه قاعدين يجهزوا في القاعة وكده ح امشي واحتمال اتأخر، ما تخافي ح ارجع مع شهد. *طيب. انا زاتو شايفه مافي داعي ل الكورسات دي ول شغلك حق تنظيم المناسبات دا، كان وافقت نعمل عرسك نهاية السنة دي فيها شنو، بعدين خالد دا زاتو صابر اول تقول جامعة وهسا عملتي برنامج شغل وكورسات. _والله ي امي هو موافق وبعدين في حاجات كتير ما جاهزة عشان نعمل العرس،ولو الكورسات انا بحب الحاسوب دا في كل ما لقيت حاجه جديدة او برنامج جديد بحب اتعلمُ، شغل التنظيم دا فيه متعة،بعدين زاتو عشان اعرف الناس ديل بيعملوا شنو في أعراسهم عشان اعمل بعدين في عرسي. *يا بت انتِ فاكر خالد دا زي ناسكم القاعدين تنظمي ليهم ديل ول شنو، براهم في التنظيم دا يدخلوا ملايين،خالد شنو كمان ال يدفع لك قدر دا. _يدفع ويعمل لي والله، قول الخوف من عمتي تقول ما في داعي ل الكلام دا *اصلا ب تقول عمتك. _والله ي امي الا لو طمع سااي، لاكن القروش ال ح يدفع لينا احسن من يدفع في اي حاجه براها، يعني احنا ح نحجز ل العروس الكوافير والفستان والحنة، وهو زاتو مكان صالون الحلاقة، الاكل ال ف الصالة الصالة زاتها، دا غير الزينة.. وكمان ح يكون وفر ل نفسُ تعب المشاوير. ف لو هو فالح بالجد ح يشوف ان القروش حقت شركة التنظيم أقل. *عارفة انا ي بت، بس بقول لك عمتك تعرفيها براك، تقول جرتق بس هسا. _عليك لله لمن يجي الوقت داك ربنا كريم. ب المناسبة المرة الشغالة لنا الاكل قالت دي اخر مناسبه ليها لان ح تسافر، فكرت اجيب البنات الشغالات معاك وانتي كمان تشغلي معانا. *هييي انتي كمان،انا شغل المناسبات دا عندي بمزاج وانتو شغلكم دا داير زول منتظم، انا عادية ممكن اكون ما محتاجة قروش، أوقف شغل، عشان كده خليني بعيده انا. _خلاص بضرب ل البنات، هم زاتو ما شاء الله معلمات. ____________________ '' في جانب تاني '' _انت ل شنو ما عايز تفهم يامروان حالياً انا زولة مخطوبة وح اكون زوجة بعد كم يوم. *'' المتصل" لا، ما عايز افهم انتي حبيبتي انا وبس، خلااص خلاص انا ح اتغير بس انتي ما تمشي ي همسة عليك لله _مروان انت ما ح تتغير نهائي عارف ليه؟! *لأن انا ما كنت حبيبتك يوم، انا كنت وحده بتحاول تنسى بيها حبيبتك الميتة،ولو جات وحدة غيرتك بالجد معناها انت حبيتها. _همسة دا شنو الانتي بتقول فيهو دا، انا بحبك ما تمشي. *مروان.. مروان انت سكران حالياً كالعادة وما عارف انت بتقول في شنو اقفل وتاني ما تضرب لي. "تتتتتت الخط قفل" "قاعد في الأرض ودموعُ بتنزل وحدة وراء التانية " _انا كل الناس ال بحبهم ب يمشوا مني ل شنو، هو انا كعب لدرجه دي "التلفون يضرب" الو... اي أحمد *"المتصل " انت وين يامروان ابوك من قبل بسأل منك قلت ليهو بايت معاي وخليتك الصباح نايم، تعال سريع لان ابوك متعصب شديد. _هو طبيعي متعصب، خلاص خلاص مسافة السكة واجي.
