#ذات لحظة #الحلقة "2" ______ *تقصد ما كضب عليكم، انا بس عايز اعرف انت ل شنو بتعمل في نفسك وفينا كده، لو الزول حياتو ح تقيف بعد كل عزيز يموت ليهو الدنيا دي ما كان ح تكون في، يعني انت فاكر ان امك ول بت عمتك بيكونوا مبسوطين. وكده ب حركاتك دي قاعد تثبت ليهم انك حزين علي فراقهم، كلنا صعب علينا فراقهم بس نعمل شنو دي سنة الحياة، وانت كمان لازم تكون مؤمن بالقضاء والقدر، وانت ما سبب في موت وحدة فيهم. _لا انا السبب ي ابوي *يعني ب طريقتك دي هم ح يرجعوا، هسا في يديك تدعي ليهم وتشوف حياتك الواقفة دي، انت هسا عمرك ثلاثين، مفروض يكون عندك عيال زاتو، انت ما محتاج تجهز زاتو او تبني نفسك. _"مروان قام من الكرسي " _ايواا قول لي الموضوع كده، كان تقول لي طوالي تفتح سيرة العرس بدل المحاضرة دي، انت عايز تصل ل نقطة العرس دي اهاا شوفت لي وحدة من بنات اصحابك ديل ول قلت ل عمتي تشوف لي عروسة، عشان اجيب لك حفيد، يوصل مسيرتك الأنا قاعد اخربها لك. *" قام من مكتب متعصب " اول حاجه صوتك ما يعلى، انا من قبل بتكلم معاك بكل هدوء، بعدين كويس انك عارف ان انت خارب مسيرتي،ووو اي ي مروان شوفت لك عروسة. _وانا قلت لك ي ابوي انا ما ح اعرس ما ح اعرس بس لمجرد انك داير لك حفيد، ول عايز تجامل لك واحد من اصحابك على حسابي. *ياود احترم نفسك واتكلم معاي باحترام انا بقول لك كده عشان تلم بدل انت صايع وضايع كده، و القروش كلها ضايعه في البنات والشي القاعد تشرب دا. "في أثناء الجوطة والصوت العالي جا مصطفى" =في شنو ي خالي صوتك وصل نهاية الشركة. *شوف صاحبك دا. =مروان اطلع، بجيك هسا انا. "بعد مروان طلع" =اهدي ي خالي اهدي، ح اطلب لك عصير ليمون. *اتكلم مع الود دا شكلو كل ما يكبر قلة الادب قاعدة تكبر معاهو. =حاضر بتكلم معاه، انت اهدي هسا ___________ "في مكتب أحمد صاحب مروان ومصطفى " _في شنو ي مروان صوتك انت وابوك لمن نهاية الشركة واصل. *موضوع كل مرة، قال عرس قال. _والله ي مروان، ابوك عندو حق يعني انت ولدو الوحيد، وعايش حياتك كده وما عايز تعرس وهو طول عمرو قاعد يأسس ويبني في الشركات والمصانع، بعدين هو ما عايز منك حاجه غير تعرس، في زول يقولوا ليهو عرس في الزمن دا يقول لا. *في، اي انا، ابوي العرس زاتو حقي دايرو ل مصلحة، بعدين انا ما قاعد اشوف نفسي عريس غير ل وجن. _ي مروان وجن ربنا يرحمها، انت لازم تعيش حياتك وتشوف مستقبلك، يعني ح تكون كده ل متين. *ما عارف ي أحمد بس شكل المشكله فيني انا، لمن قلت ابدأ من جديد البت مشيت وقالت عايزه تعرس. _همسة؟! *اي، عرسها يوم الجمعه. _كل حاجه قسمة ونصيب، واكيد يعني لخير. "جا مصطفى قطع كلامهم" =و دي منو كمان البتكلموا فيها وعرسها يوم الجمعه _همسة. "قاعد مصطفى في الكرسي المقابل ل مروان" =ما تشيل في قلبك وتزعل سااي،هي لو بتحبك بالجد كان قعدت، ورفضت العرس دا. *وذنبها شنو تقعد مع واحد صايع وضايع وما عندو مستقبل. =مروان انت زول حساس شديد وانا عارف ان حياتك دي ما عجبك وانت بتعمل كده عشان تنسى. "أحمد عشان يغير السيرة" يلا ي شباب الظهر خلاص ح يأذن نمشي نفطر ونصلي بالمرة. *لا، ي أحمد امشي انت ومصطفى، انا عندي كم مشوار، بجي عليكم المسا. _________________ "في جانب تاني" *الوو... اي شهد... نازلة نازلة والله '"بعد وصلت لقيت صحبتها منتظره في العربية"' =ساعتين ساعتين ي هُيام " ب ضحكة" *انا خلصت المحاضره كده دقيقتين انتي اتصلتي خلي امورك دي ي شهد. =انا دقيقتين بالنسبه لي ساعتين ما عارفه انا بخاف من الزحمة، بعدين شارع المعهد دا زحمة مبالغه. *اي ما عشان الشركات القريبة ليهو دي. =ي رب نطلع ب سلام من الزحمة دي "مروان كان برضو بيحاول يطلع من الزحمه دي، شهد كان سائقه براحة، وهو مستعجل أتجاوز عربية شهد وقرب يضربهم" =عميان انت... مستعجل مالك.؟؟! "مروان وصل سواقه زي ما قاعده تتكلم معاه " *شهد اهدي، مشا هو خلاص =غبي، مفتري دا كمان *هو انت تعرفيهو لمن تقول عليه مفتري =اي، في زول ما يعرف مروان الزين صاحب أكبر الشركات في السودان. *انا ما بعرفو" بضحكة" =احسن زاتو ما تعرفيهو، واحد صايع وضايع ساي، حياتو كلها شرب وبنات وكل عليه *لا حول ولا قوة الا بالله، بعد دا كلو. = اي، ابوه عندو منصب كبير، وشركات ومصانع والعمارات في اي مكان عندهم ، بس تقولي شنو، واتخيلي هو ولد واحد وعندو اخت تقربيا. *خسارة يضيع شباب كده. =وبعد دا كل البنات مكسرات فيه. *على شنو ب لله =والله النصيحه هو سمح، وكمان عندو قروش *ما عندهم شغلة ديل كمان، احب لي واحد عشان قروشو وشكلو.
