#ذات لحظة #حلقة '3' _____ متوسطة الوزن و القامة، ذات بشرة قحم | NOVEL • روايات
#ذات لحظة #حلقة "3" _____ متوسطة الوزن و القامة، ذات بشرة قحمية ، ترتدي اسكريت اسود وقميص ابيض فيه بعض الزهور الزاهية مع جزمة رياضية باللون الأبيض،تقيف في منتصف الصالة " هُيام " _يلاا بس كده الإضاءة ظابطة يا عمرو، يلا نبدأ الإضاءة مع الموسيقى طوالي... ظابطة كده يلاا نعيد تاني ي شباب عمرو تعال قريب. اول حاجه قبل الحفلة تبدأ ح نعمل شنو؟! *ح نشغل الفيديو فيه صور العرسان. _طيب الحفلة بدت التصوير كيف؟! *بالترتيب، وكل مصور حافظ دورُ ومكانُ _العرسان وصلوا ح نعمل شنو؟! *الإضاءة تقل الكاميرات عليهم ونشغل الاغاني ب الترتيب، بعدها الاسلو ونغير الإضاءة مع الموسيقى، بعد كده نرفع الإضاءة ونرجع إلى إضاءة الصالة العادية. _والعشاء كيف؟! *بعد الساعه عشرة نوزع. _وبعدين ح "قطعت كلامها" =ما في بعدين نمشي بعد دا تعبت انا ي هُيام _حاضر طيب دقيقه ي شهد بس عمرو ما تنسى اتصل على مصور اللقطات. *حاضر طيب _يلا مع السلامة ي شباب. =والله تعبانه تعب ي هُيام _خلاص خليني اسوق لك لمن اصل بيتنا وبعد داك سوقي انتي. =طوالي، يلا اركبي. __________ _مشيت وين انت ي زول اختفيت كده!؟ *كنت مع ناس حبوبة. _عليك لله لقيتهم كيف، يوم الجمعه كنا معاهم *اي قالوا لي =انا نعست ي شباب ح امشي تصبحوا ع خير. *بدري ي أحمد اقعد =بدري من عمرك،تعبان بس وعندي قومه بدري بكرة. _* مروان ومصطفى بصوت واحد خلاص الله معاك. _ح تجي معاي البيت، عمتك قاعده تسأل منك لك قريب تلاتة يوم ما شوفتها. *ما كان عايز امشي لأن تاني ح يتكلم معاي ابوي، وانا ما ناقص كفاية الصباح. _لا، ما ح يتكلم، قوم نمشي طيب. *طيب ________________ "في جانب هُيام" "تشرب في الشاي مع امها في الحوش " _وبكرة ح تمشي المشاوير دي كلها ب شنو؟! *امي معاي ناس ممكن نأجر اي حاجه. _ هو العرس بعد بكرة صح. * اي ان شاء لله . _اديك العربية تمشي بيها بكرة. *لا ي يمة ما يحتاج. _خلاص طيب، قبل انسى يوسف ضرب سأل منك، قال ضرب لك مقفول تلفونك كان. *اي قبل كان نازل شحن. _اقوم انوم انا، تصبحي ع خير ي بتي،ما تنسى ارفعي معاك صينيه الشاي دي. *حاضر، وانتي من اهلو. _______________ "فيلا الزين" _امي امي مروان حبيبك جا. *مروان حبيب عمتك تعال تعال ي ابوي مشتاقه لك شوق. 'بقيت واقفه مسافه تسلم عليه وتحضن' مالك ما بتسأل من عمتك ومن اختك. =امي مروان بايت هنا الليله ح تقعد تسالي فيه كده لمتين ، رايك شنو تجهزي له احلا عشا. *من عيوني ابوي. 'باس يدها مروان' _تسلم يديك ي عمتي. 'بعد مشيت ' _'انا ح امشي اسلم ل مروة' _______ " في جانب هُيام " والله ي يوسف الحمد لله مع جرى الشغل والكورسات بس. انت كيف مع القراية ومصاريفك خلصت ول ف؟! ..... الحمد لله ان شاء الله دايما موفق ي يوسف. ..... دقيقه خليك معاي ي يوسف خالد في الانتظار. ..... لا ما تقفل. ..... خلاص طيب مدام بكرة عندك دوام بدري. ..... وانت من اهلو. ' قفلت الخط' الو اي خالد ...... مسا النور ..... انت كيف ...... الحمد لله اي قبل ما كان شاحن التلفون. .... اي يوم الجمعه ان شاء الله .... امين يارب. .... _________ " فتاة قصيرة القامة، اخدت الكثيرة من ملامح ابيها وأخيها، تجلس على سريرها ترتدي نظاراتها الطيبة، هنا مرجع ثقيل الوزن والمعلومه، وهنا قلم وقاموس لترجمة" *ممكن ادخل ي دكتورتنا =مروان 'قامت تسلم عليه بالاحضان' مشتاقين والله، مالك ما بتسأل *كتير والله، والله مع مشاغل الدنيا =انت عارف لو ما جيت الليله كنت ح أكون كده اسبوع ما شوفتك. *عمتي تحت تقول تلاته يوم وانتي اسبوع دا كلام شنو يخووانا =لا، انا قبلها ما لقيتك زاتو مرتين كنت بايته في المستشفى ومرة الصباح طلعت بدري انت. *اي صح. كيف هسا انتي مع القراية؟! =دعواتك خلاص هانت. *ربنا يوفقك واشوفك دكتورة كبيرة، يلا انا نازل تحت قلت اجي اشوفك. =دقيقة نازلة معاك *خلاص يلا انا ح امشي اسلم على ابوي. _______________ "صباح يوم جديد" _يلا اول نمشي نشوف العروس وموضوع الكوافير دا *هُيام عمرو ظبط موضوع الصالون والتصوير، في وحده بت ح تكون مع العروس، و واحد مع العريس _خلاص الحمد لله، بعد الكوافير نرجع المكتب عندي حسابات اخلصها وارجع البيت. *ترجعِ وين ي هُيام انتي الليله مش بايته معاي _بايته شنو ي بت، امي تقعد براها في البيت يعني. *يوم واحد هو، بعدين ح تعملي شنو لمن تعرسي؟! _يوسف ح يكون خلص الجامعه وبيكون معاها *قول لي قاعدة تهظري ي هُيام، يوسف لسه باقي ليهو تلاته سنة، ح تتأجلي في عرسك تلاته سنه تاني،وانا كمان قلت بدايه السنة كده يكون.
