#ذات لحظة إبتهال حسن حلقة '17' __________________ *خير مالك | NOVEL • روايات
#ذات لحظة إبتهال حسن حلقة "17" __________________ *خير مالك ياعمة فاطمة _اتذكرت وجن بتي ربنا يرحمها، امبارح السنوية حقتها "الشغالة جات قالت ليها -قال لك ربنا يتقبل _اللهم امين.... عم على دا الرجل المسؤول من السنوية حقتها... *إن شاء الله ربنا يرحمها _آمين يارب... طالعة غرفتي انا *اقعدي يا عمتي، مش قلت لي تعالي ما تقعدي براك، هسا انتي ماشه ليه.... _عايزه اخد لي غمضة... قبل انسى بكرة الظهر ح نطلع نمشي الدكتور *إن شاء الله __________________________ "المساء" 'هُيام بتكلم مع شهد بالتلفون' والله انا كمان مشتاقة لك يا شهد.. والله بكرة ماشيين الدكتور لو لقيت طريقة بجيك المكتب... لا ماشه معاي عمتي فاطمة... مروان من امبارح الظهر ما جا... ما متشاكلين... ما عارفه بس الليله عمتي فاطمة قالت لي امبارح كان السنوية حقت وجن قلت احتمال ما جا عشان كدة.... كيف ما سبب.... الود دا حساس، وموت امو وجن ومؤثر فيهو شديد.... ما قاعده ادفع عنو بس سمعت من الناس، أن كان كيف وهسا بقى كيف... ف كل الحاجات بتقول ان هو زول كويس بس الصدمات المرت عليهو خليتو كدة...... اي قررت أساعد... اصلا آخر مرة هو براهو قال لي أساعدو، بس يجي البيت هو كدة اول.... ما قلقانة عليهو... بس خايفة يشرب وكدة... خليك مني... اها مصطفى مالو قلت لي... ...... هيييي والله طلعت ما هين يا مصطفى والله يا شهد هو الود من ناحية محترم هو محترم ومهذب وما سمعت منو شي قبل كده.... فلو انتي كمان معجبة بيهو... مالو اتكلمي معاهو عشان تعرفيهو اكتر.... .... هييي داخل لك انتظار قلت لي... خلاص يلا امشي اتكلمي معاهو... انبسطي تستاهلي انتي السمح... "بعد قفلت من شهد رجعت اشوف رسومات مروان لمن نعست ونمت، صحيت لقيتو برضو مافي، قمت دخلت الحمام" _____ _مروان برضو ما جا؟! =ما أظن والله، هُيام لسه ما نزلت زاتو، عشان اسألها _والله مروان ما صح منو الكلام دا... اصلو ما يجي يشوف بت الناس دي.... هو عارف ان الليله ماشيين الدكتور؟! =بضرب ليهو من امبارح تلفونو مقفول _مصطفى طلع؟! =اي قبيل، قال عندكم اجتماع ماشي يجهز ليهو _اي اي... يلا اقوم انا زاتو... كلمت ليكم السواق يجيكم الظهر، ودكتور محمد كلمتو بكلو حاجة انا... =طيب _بعد طلعوا من الدكتور اضرب لي، و بالمرة مدام طلعت شوفي هُيام لو عايزه حاجة اشتري ليها =حاضر... _يلا مع السلامة ____________ "في الشقة.... مروان نايم في الأرض ما واعي، كان شارب كتير ولسه في التربيزة في الخمرة" _________ "الظهر في الطريق رجعنا البيت،بعد الدكتور قال لي الجنين كويس والنبض حقو كويس كتب لي فيتامينات... كنت مبسوطة اول مرة اشوفو بالموجات، قلت الحمد لله ال ما نزلتو... كنت ساكتة في العربية بس ماسكة بطني وبتكلم معاهو براحة... الليله اول مرة اشوفك يا حبيب ماما... الحمد لله ما سمعت ل الشيطان القال لي انزلك... بعد قررت اخليك ما عندي مشاعر اتجاه اي حاجة بس شوية شوية بقيت احس بالتغيرات ال ف جسمي ول بطني والليله انبسطت اكتر لمن شوفتك.... اوعدك لمن تجي الدنيا تلقى كل حاجة تمام.... شوية وعمتي فاطمة قالت لي =احساس الأمومة حلوو... شكلك انبسطت لمن شوفتيهو في الموجات... _انبسطت شديد.. =ربنا يحفظ لك ويحلك بالسلامة _إن شاء الله =اها نفسك في حاجة نشتري لك _لا...ما عايزة والله =خلاص تعالى اعزمك غداء انا... في مطعم ظريف هنا "وصلنا المطعم واكلنا، وقعدنا شوية واتحركنا إلى البيت.." _______ "المساء في بيت الزين" "عم احمد ومروة كان بشوفوا في الصور حقت البيب طلعها لنا الدكتور..." -ابوي شوف صغير وحلو كيف... _اي... ماشاء الله -اها يا هُيام لو ولد منو ول بت منو؟! *لسه ما فكرت في أسماء انا -لسه ما عرفتو ولد ول بت؟! *قال لمن الشهر الجاي ان شاء الله " كنت حاسة بوجع ظهر شوية، قلت احتمال عشان ما نايمة كويس ومن قبيل قاعدة.." *بعد اذنكم امشي انوم انا -ما بدري يا هُيام *بدري من عمرك يا مروة =تعبت الليله اي، امشي اخدي راحتك... يلا اديها الصور يا مروة *لا خليها تشوف يا عمتي.. -لا خلاص شوفتهم... لاكن الشهر الجاي ان شاء الله معاك انا *ان شاء الله "طلعت الغرفة فوق، خت الصور في التربيزة، طلعت الطرحة ورقدت نمت" ______________ "عم احمد ضرب ل مروان تلفونو مقفول" _تلفون مقفول برضو... =انا كمان من قبيل بضرب ليهو... والله يا أحمد يا اخوي... حاسة ان احنا كمان قاعدين نظلم بت الناس معانا... والله لو مروان بقى في الحال دا لمن تولد هُيام، انا ال بخليهو يطلقها... _لا ان شاء الله لمن الوقت داك يكون الحال بقى احسن
