#ذات لحظة إبتهال حسن حلقة '20' __________________ =انا ما عا | NOVEL • روايات
#ذات لحظة إبتهال حسن حلقة "20" __________________ =انا ما عايزه حب وكلام فاضي زي دا _ليه، اكيد في سبب، مثلا حاسه ح يضيع لك وقتك وقرايتك، لو كده انتي هسا قلت هو قاعد يقرأ معاك ويساعدك، واكيد هو كمان عايز يقرأ لو من الناحيه دي شايفه ان ما سبب رفض ل الموضوع =لا.. ما كده _طيب شنو، قولي =بصراحة انا قاعده اخاف الحاجات القاعد يعملها مروان طلع فيني انا، اكيد مروان في علاقات كان القديمه دي كسر قلب وحده _ما تفكري كده، دا عدم إيمان منك بس، مروان ربنا يهديه، ربنا كريم علينا ما قاعد يحاسب زول ب عمايل زول هو انتي بتحبي الود؟! =ما عارفه، بس شكلو. _شكلو مستهبلة انتي والله، شوفي الود دا محترم على حسب كلامك عنو، المهم انتي شوفي هو عايز العلاقه دي ل قدام... ما تسأليهو طوالي كده، بطريقه ما مباشرة =طيب _يلا تصبحي على خير، لأن أنا انوم لك هنا. "طلعت عايزه اطلع مروه قالت " =هُيام _اي =شكرآ، كنت محتاجة اتكلم والله _عفواً، في أي وقت انا موجوده تعالى "مر اسبوعين، خلال الأسبوعين ديل كنت بمشي ل امي ومروان لمن يجي من الشغل يجي يسوقني، امي بقيت كويسة ومنتظمة في العلاجات" "بيت أهل هُيام" _شهد قالت لي بتجي تسلم عليك الليلة" الباب خبط" شكلها جات، امشي افتح ليها =السلام عليكم _وعليكم السلام، بت حلال هسا بقول ل امي شهد جايه تسلم عليك،تعالي ادخلي =خالتو سوسن، اها بقيتي كيف -الحمد لله احسن كتير، انتي كيف وأهلك كيف؟! =كلنا كويسين الحمد لله - عن اذنك يا شهد ماشه ل جيران هنا عندهم وفاة =اتفضلي يا خالتو اذنك معاك بعد امي طلعت. _تعالى الغرفة =هُيام ما شاء الله بطنك ظهرت، الدكتور لسه ما قال لك ولد ول بت _لسه مفروض الشهر دا عندنا مقابلة. =كويس، اها مروان كيف معاك _كويس والله =كويس والله ف عينك قول لي ب التفاصيل، ما الا أسألك انا _خلاص كويس والله، اتغير بالجد، بقى قاعد يرجع البيت بدري، ومن البيت ل الشغل، حتى ابوهو مبسوط من التغيير دا، أمي كمان مبسوطة من ايام المستشفى، بقيت تقول ليهو ولدي، قالت لي الود كويس ما كعب. =اها وانتي؟ _انا شنو =مبسوطة ول لا؟! _ما عارفه، إحساس قلبك يقول ليك اي وعقلك يقول لا ما ينفع أنا لمن هسا ما عارفه احساسي دا حب ول لا، انا الاحساس دا كنت قاعده افتش فيهو لمن كنت مع خالد =مطمئنة معاهو؟! _جدآ، بالرغم في الأول كنت بخاف، وبخاف شديد، عارفه بقيت قاعده اشتقت ليهو كتير ، بقيت انتظر يوم الجمعة يجي عشان نقعد مع بعض شويه لأن باقي الأسبوع كل بكون مشغول. "بقيت اضحك" =مالك؟! _ح تقولي على مجنونه، بس عارفه لمن ينوم في الغرفه التانيه بمشي بعاين ليهو وهو نايم الأحاسيس كلها بقيت عكس بعض، الخوف بقى أمان، وعدم شوفتو بقى شوق ليهو =دا حب على فكرة _بس قلبي يقول اي وعقلي يقول لا، يقول لي إحتمال ما عندو مشاعر اتجاهك، وما تنسي هو عمل شنو زمان... =اسمعي كلام قلبك وما تفكري يا هُيام... هو انتي سامحته؟ _ما عارفه احدد إذا اي ولا. خليك انتي مني، اها انتي اخبارك شنو مع مصطفى؟ =الجمعه الجايه ان شاء الله يجي يطلب يدي من ابوي _يخس عليك، عندك خبر حلوو زي دا وساكته الف مبروووك حبيبي، ربنا يتم لك على خير"قمت حضنتها" =الله يبارك فيك _اهاا شعورك شنو؟ =مبسووطة و خائفة _ليه؟ =خائفه يكون انبهار بدايات وأول ما يحصل على، ينزل القناع ويطلع زي ابوي، يضرب وقت متعصب ويخون ويرجع يقول آسف كانت نزوة _شهد حبيبتي ما تحكمي على علاقتك ب مصطفى ب علاقة ابوك وامك أو أي علاقة تانية =ما بقدر، اصلا كنت بهرب من خطوة يجي ل ابوي دي، لكن هو بقى مصير _ما عشان ود أصول، وعايزك بالجد،انبسطي وما تفكري ف الكلام دا.. وزي ما قلت ما تحكمي على علاقتك ب علاقات ناس تانيه اي زول عندو ظروف، يعني مثلا هسا لو سألتي زول متزوج العرس كيف، ممكن يكون ما مبسوط في حياتو ويقول لك ما حلو وما تعرسو، تجي تسألي زول تاني مبسوط وراضي يقول لك حلو وعرسو يخووانا،كده احنا ح نسمع ل منو فيهم. احنا لو قعدنا نحكم على علاقاتنا ب تجارب ناس تانية كده ما ح نعيش تجربتنا واحنا مرتاحين ومبسوطين،عيشي تجربتك براك من غير مقارنه مع تجربه زول ومن غير ما تسمعي ل زول . وبعدين والله العظيم، مش مصطفى دا قاعد معانا في البيت الفتره دي كلها ما سمعت منو حاجة او زول قال إن عمل حاجة، امو دي في عيونو، خالو كمان مبسوط منو ، ف حقيقي هو ولد مهذب ومحترم. في زول فيهو المواصفات دي ما تخافي وخليك مطمئنة. =ان شاء الله ان شاء الله. "شهد قعدت معانا لمن العصر طلعت، مروان جا المغرب دخل سلم على امي وطلعنا طوالي" ______________
