**اصلا ما حاولت ارد على الرسايل لاني خفته غرضو شنو يرسلها لي و | روايات سحر سمير
**اصلا ما حاولت ارد على الرسايل لاني خفته غرضو شنو يرسلها لي وعرف من وين اصلا؟! تفتكر حد بعرفنا؟! ما هو لازم __ انا حشوف الموضوع دا انتي ما تقلقي بيه راحتك انسيه وخليه علي. **حاضر نسيتو "بتضحك" __ ايواا شايفة حتى ضحكتك احلى **احم احم احترم نفسك __ههههه احترمتها طيب اسمعيني بالنسبة لي عشان اكون واضحك معاك انا كان عندي نية ارجع بورتسودان او اسافر بره السودان ودا كلو خليتو عشانك من اول يوم شفتك ما بكذب لو قلت قلبي نقز ليك انتي وامكن تحديد مصيري واتخاذ قراري الفضل برجع ليك فيه بعد فترة تردد .. **طيب عشان اكون على بينة انت هسي ناوي على شنو؟! __ناوي افتح مشروعي الخاص بتاع التيم القلت ليك عليه وزي ما عارفة اشتغلت عليه من بدري عملت دراسة المشروع وختيت التكلفة الكلية وحددت المكان وحاليا باقي مجرد اجراءات ورقية مع المحامي عشان الايجار والضرائب وبعدها ح افتح معاينات الوظايف وتكون الانطلاقة بإذن الله. **ما عاوز ليك وظيفة مسؤول إعلامي ح افيدكم شديد __تشتغلي معاي؟! **هههه ياود انا بهظر معاك ساي __بس انا جادي عاوزك معاي رايك شنو تبقي شريكتي؟! ** بس انا ما عندي راس مال اشاركك بيه __انا عاوزك كشريكة حياة في كل خطوة بعملها تكوني معاي برايك بتشجيعك بمساندتك لي انا حابي نعيش حياتنا من الصفر خطوة خطوة نبنيها مع بعض الحاجة دي تهمني شديد في كل التفاصيل البتجمعنا فيما بعد . ** اممم موافقة __اقول على بركة الله يعني ** ايوة وربنا يجعل ليك في كل خطوة بركة يارب ✎﹏﹏﹏﹏﹏﹏﹏﹏﹏﹏﹏﹏﹏﹏
"قدام بيت ناس سهاد بتنزل هي ووصال ، الهادي فاتح قزاز العربية وبتكلم معاهم" الهادي : اجيكم على الساعة كم كدا؟! وصال : تقريبا قصي حا يغشانا ، ربنا يعوضكم يا الهادي معليش اتلومته انا ما عرفته الا بعد رجعنا البيت بالليل ، الليلة بغشى مروة اطمن عليها. الهادي : ما عليك لوم ، المهم كان احتجتو حاجة اتصلي بي انا زاتي بقابل قصي اشوفو عمل شنو يلا معاكم سلامة " بدي سهاد لمحة سريعة وبتحرك بعربيتو" سهاد : مرتو مالا اجهضت وقعت ولا شنو؟! وصال : لالا تقريبا عندها مشكلة كل ما تحمل بحصل ليها اجهاض ربنا يرزقهم بالزرية يارب ما تستاهل والله الهادي ومروة ديل طيبانين بطريقة ومروة دي حتى صوتها رايق كدا ربنا يكتب ليهم السمح بعد تلاقيها حتحبيها شديد زولة الله . سهاد : اهاا ان شاءالله
سهاد "بتكركب بالمفتاح بخشو بقولو بصوت واحد" بسم الله الرحمن الرحيم __لما اخش البيت باقي لي مسيخ متخيلة احمد حا يطلع قدامي في اي لحظة ** عارفة طلوعك من البيت دا لخير انا شايفة احسن ليك __تلفوني امس نسيتو هنا "بتمش على الكرسي مكفي بالجمبة بتفتحو تعاين ليه" عايني سلاف ضاربة لي كتير بتكون امس قلقت لانو قالت لي تجي تنومي معاي **دي جارتك البجاي دي اللاقيناها ايام الوفاة __اي ياها زاتا **حبابة بطريقة هي وامها __اي ياها الوحيدة العرفتهم بمش ليها وبتجيني طوالي عندها بنوته صغيرة اسمها براءة واخوها مصطفى قاعد معاها في البيت وامها دي بتجيها طوالي ، راجلها مغترب.. المهم متونسة بيهم حيفقرقو علي شديد ما عارفة اقول ليها شنو **اي متزكراها كانت تمشي توديها لاختها وترجع تاني هي هي وسائل التواصل دي قربت بين الناس كل ما تهف ليك اركبي زوريها الزي جيرة سلاف ديل نادرين .. __سمح بعد نطلع نغشاهم بالمرة **طوالي ما عندي مانع ، عايني حا اجر الكرسي احاول انزل الشنط الفوق ديل "سهاد واقفة غازة يديها في نصها" __ما حتلحقيهم يا وصال الدولاب دا طويل والشنط ديل كبار واتخيل لي زاتي ما فاضيات تقومي تقعي ساي **اها طيب نسوي شنو الهادي زاتو فوتناه __اقيفي انا بتصل بسلافة مصطفى اخوها دا طويل يجي معاها وينزلهم لينا **ما عارفة بس ننتظر قصي احسن __ ما معروف قصي يجي بتين ديل ستة ضلف حا نفضيهم " ماسكة تلفونها وقبل تضغط على رقم سلاف جاهم صوت الباب بدق" وصال : شايفة مستعجلة ساي دا قصي جا خليكي انا بفتح __السلام عليكم هي وصال **سلاف تصدقي بت حلال هسي في سيرتك "بسلمو على بعض بالاحضان" خشي لي جوه __وينا فلانة دي انا جاية اديها شكلة "سهاد جاية طالعة بتضحك" سلاف مخلوعة بتعاين فيها واي وشك دا مالو مظلط كدا ومورم وقعتي ولا في شنو سهاد : اسكتي ساي موضوع طويل سلاف : لا جد طبعا كنت ما عايزة اسلم عليك ما بتردي على تلفونك مالك؟! بس هسي بعد شفت وشك مورم ومظلط قلقتي بي جد الحصل شنو؟! و امس بالليل انا ومصطفى رجعنا ودقينا وفترنا "وصال بترد عليها" بتحكي ليك براها برواق بس هي تعبت بالليل وكان ما قصي والهادي جو بالصدفة ما عارفة الحصل شنو كان وانا تاني مسكتها عندي ما خليتها تجي براها جسمها مرهق ..
