بتعاين ليها مسافة وبترجع تقراها مرة اتنين تلاتة .. ما مصدقة ' | روايات سحر سمير
بتعاين ليها مسافة وبترجع تقراها مرة اتنين تلاتة .. ما مصدقة "دموعها جارية " اول مرة أعرف ان احمد بكتب خواطر ما حصل جاب لي سيرة عن كتاباتو لي ؟!... ولي حاشر النوته دي هنا تحت كدا كأنها مدسوسة حتى ما فهمت هو قاصد شنو للدرجة دي ما كنت مركزة في تفاصيل تانية بتخصو .. "بتقلب صفحات تانية عينها بتقع على كلام مكتوب بتبدا تقرا ضربات قلبها بتذيد مع كل كلمة...
بتقيف لحدي نص الكلام
"العبرة بتخنقها بتقوم على حيلها وبتقعد تاني" مع سيلان دموعها بتقفل النوته ااااه ياقلبي اااه "بتخت يدها على خشمها اييييي بكاها البتوقف فيه وبتكتم في صوتو"
"بتدنقر على شكل قعدت ركعة الصلاة ومغطية عيونها بيديها الاتنين" بتكتم صوت بكاها " .... "وصال خشت وعينها على سهاد بخلعة بتسرع عليها
سهاد سهاد مالك فيك شي؟!قاعدة كدا مالك؟! وصال بتهبشها من كتفها
"سهاد بترفع راسها وبتقوم طوالي"
انا انتهيت "بتلملم في الحاجات وبتقش في وشها" اتزكرته احمد بس "بتحاول تبتسم قدام وصال رغم ملامح ما مفهومة ظاهرة عليها" ما تقلقي ماف شي تاني خلينا نطلع بتتحاشى تعاين ليها في وشها" "بتشيل شنطة النص بتحشرها في الجيب البره بتاع الشنطة الصغيرة" وصال : سهاد انتي كويسة مالها ملامح وشك فجأة اتغيرت كدا؟! سهاد : كويسة شديد يا وصال صدقيني يلاكي ورانا شغل كتير بس عشان مواعدين سلاف نغشاها اول ما نتأخر عليها ونرجع نلملم العدة في كراتين جوه انا خاتاهم في المطبخ.
وصال : لالا اسمعيني قصي قال لينا حدكم الدولاب بس هو ح يجي معاه واحدين بشيلو الشنط الستفناها دي قال حجز مخزن وبفتش هسي ل عربية كبيرة يجيبهم يشيلو العفش والعدة وكل شي .
سهاد : طيب كتر خيرو.. يلاكي
"وصال بتمشي وراها بتعاين ليها بوجع وانها ما قادرة تواسيها او تخفف عنها إحساسها بفقد اعز انسان عليها"
#عند_ناس_سلاف
"داخلين على الحوش" " اتنين زير باللون البني مختوتات في مزيرة حديد تحت الشجرة الكبيرة سهاد : الله يا سلاف الازيار الفيهم ماسورة ديل جبتوهم متين؟! سلاف : ايييك طول ياخ عشان تعرفي روحك بقيتي كعبة ما بتجينا سهاد : ههه انا عاوزة اشرب منهم ملانات؟! "بتمشي عليهم" سلاف : اي ، اتفضلي اتفضلي جوه يا وصال ، الحقينا جوه الصالة يا اخت " بتضحك معاها" وصال : بيتك سمح عندك حوش احلى حاجة الشجر الفيه دا وفريقكم زاتو رايق سلاف : الله يسمح ايامك ، الشجر دا نافعني مرات الكهربا بتقطع نقعد تحتو ومرات ساي نتونس بره ونشرب القهوة فيه وصال : بتك وينا؟! سلاف : براءة بتقعد هي من حبوبتا تجي تدينا طلة بتطلع معاها في طرفها لناس اختي ما بعيدين مننا وصال : ههههه اخير ليها مفسحة روحها
#بره_الحوش سهاد بتمسك كباية الفخار المختوته في الزير وبتقعد في السرير التحت الشجرة بتغسل وشها وبتسرح بعيد بتحاول ما تبكي وتتماسك قدرتها .. "بجيها صوت" ** احم احم سهاد قاعدة هنا مالك سلاف جوه خشي ؟! "بنطة وصوت زي منتظر حد يسألو ويتفقع بالبكى" __ اي جينا هسي انا شربته موية وقعدته حبة "دنقرت راسها" **يعني خلاص قررتي ترحلي من الفريق دا؟! __ايوة **معليش للسؤال حتمشي وين؟! __ياهو زي ما قلت ليك حاليا قاعدة مع ناس وصال لما القى لي سكن مناسب برحل واقف جمب الشجرة للحظة حصل سكات بتقول ليه مصطفى **نعم __بتعرف ليك شركة او جهة عاوزين ناس لشغل ؟! **والله ما عارف ، ما عاوز اكون حشري لكن شغل ليك انتي؟! ممكن اشوف ليك!! __ايوة "بصوت يأس غريب" **سهاد انتي كويسة؟! __"بدت تبكي" لا "بتوتر ملحوظ منو ما عرف يسوي شنو" **طيب انادي ليك سلاف دقيقة __لا ما تناديها اصلا انا قعدت بره هنا عشان اشم لي هواء قبل اخش ليهم جوه **طيب سهاد انا عاوز اقول ليك كلام ومع اني عارف الوقت امكن يكون ما مناسب بس انا يابت الناس داير اخش بالباب عديل ما شايف في مبرر للإنتظار ودا ما بيعني عدم مبالاة للحصل ليك او شفقة مني بالعكس انا مقدر الحزن والوضع الانتي فيه ك شي طبيعي بس الحياة دي كدا كدا بتمشي وحتستمر مرة حزن ومرة فرح بس كيف نحن نقدر نتخطى كل العقبات دي ونتعايش ونعيش حياتنا وفي الاخر كلو ببقى زكرى بنخصص ليها جذء بين كل فترة وفترة بنطراه ، انا ما حضغط عليك وكمان ما عاوز استعجل او استعجلك بس كان لازم اتكلم معاك واقول ليك إحساسي اني رايدك ودايرك على سنة الله ورسوله . وكلامي دا ليك قبلو كان في خلفية او مفهوم غلط مني فيما بعد ححكي ليك .. يعني ما بين يوم وليلة انا قررته افاتحك عن مشاعري.
"بعدها حصل هدوء وعدم استيعاب ما عادي من سهاد بتقول : لأول مرة ارفع راسي واعاين ل مصطفى واملي عيوني منو حقيقة الموقف الاتختيت فيه حاليا خلاني بتكلم من جواي لي انا بالتحديد في الوقت دا بتحصل لي كل الحاجات الاكبر من طاقتي دي اذا انا لسه ما مستوعبة موت احمد ومن كم لحظة قريت مزكرات كاتبها واتمنيت لحظتها لو كنت عارفة ادق تفاصيلو لي كان مخبي عني؟! هل انا كنت عايشة معاه كمصدر حماية وبيت ماسكني؟!... ههه ما اكتر!!
