ساعات نفكر في الناس الي مكتوبلنا نتلاقو معاهم ومزال موصلوش حيا | نُـورا نصر
ساعات نفكر في الناس الي مكتوبلنا نتلاقو معاهم ومزال موصلوش حياتنا، نفكر في المفترقات الي حننحطو على محكهم، في المدن الي حنزوروها، في المواقف الحلوة الي حنعيشوها، واللحظات التعيسة الي حتخلينا نبكو، في صبح أول عيد مع الشخص الصح، وليلة النجاح المنتظر، في شكل ملامحنا في السنين الجاية، هل حتورد ولا حتزيد الحياة تتفنن في إخفاء وجهنا!
نفكر فنضجنا وكمية الوعي الي حتاخدنا ليها الظروف، في الأكلات الي حنكونو فنانين فيها، والفنانين الي حيبدو معانا معظم صباحاتنا، في ستايل لبسنا، في تسريحات شعرنا، في إختياراتنا لفيلم كل أسبوع، في مشاويرنا الي بلا وجهة قلب مني حيكون وجهتها، في لحظات الأحضان المهمة، في أول لقاء مع الشخص الي حيقعد جنبنا لمدة فترة زمنية مدتها عمر، في بلادنا كيف بتولي، في شوارعنا كيف حتتغير، في روتينا كيف حيتبدل، فينا كيف حنكبرو، كيف حنجاهدو نقعدو (أحني) في وسط هالكم العارم من التشابه والنسخ والناس غريبة الأطوار، نفكر بأي طريقة حنحاربو الوقت باش ما يغيرناش، كيف حنمشوا طرقنا كلهم ومع مني، شن حيكون عنوان الفصول الجاية، وكيف بنتذكرو كل الي فات ..
