على طرف كل أيلول، نحب نقعمز نكتب .. نغني .. نألف قصص على حاشية | نُـورا نصر

على طرف كل أيلول،
نحب نقعمز نكتب .. نغني .. نألف قصص
على حاشية كل خريف،
نحب نعيش شعور الورق،
الورق اليافع .. الي يحاول يلمس الأرض
الخشنة أول مرة،
شعور لحظات الوداع (مثلًا)
ولحظات اللقاءات الأولى برضو ..

أخر ورقة حتفقدها أخر شجرة،
أول مطر حتستقبلها مدينة جافة!

أخر مرة حيكون فيه أخضر،
أول مرة حيلون البني كل تفصيل

أخر محاولة لنسيان ألم ما،
وأول مرة لإيقاع شعور جديد ..

مش بـ هالبساطة ..
بتعقيد،
لأن الوقت شوية
وأني ننغمس هلبا ..

لأن الليل طويل،
وأني منعرفش نبطل نكتب
منعرفش ندس إلهامي تحت لحاف
سميك ونرقد كشخص عنده عادي
يعيش بدون ما يكتب ولا يعيط بصوت عالي مثلًا ..