أبتسمت لأني قاعدة نعيش في نفس الشعور بحذافيره، شعور أول توتر ت | نُـورا نصر
أبتسمت لأني قاعدة نعيش في نفس الشعور بحذافيره، شعور أول توتر تسليم هدية، شعورأول مرة نجرب نصنع لوحة، نصمم بطاقة، نقص كرت، شعور أول لوقو نديره، أول خوف أول تردد، أول يوم نضغطت فيه، أول يوم قدمت حاجة من يديا لحد هلبا نحبه، شعور أول ظرف ورقي صنعناه وطلع فيه شوية خلل، ثاني ظرف لما طلع بيرفكت زي ما في البال، شعور السعادة لما بديت نملك في أجهزة خاصة بيا بدون الحاجة لتبهديل المكاتب والطلعات الي في كل وقت، شعور زحمة الشغل، القوائم المعبية، وشعور الإستقلال المادي، شعور الحلم الي بدي كبير ويخوف، وولا يقرب ويبان ويترتب بكل إتقان، شعور الدعم، الأراء الي تفرح، الكلام الي يخليك تكمل حتى لو أنت تعبان، شعور الإمتنان لأنه سن العشرين فاتت في الإنجازات الوقت كله ماشي لـ حاجة ليها مردود معنوي فياض قبل ما يكون مادي حتى، شعور الحب الي يحسه الإنسان كل يوم الصبح لأنه يخدم في حاجة قادرة تغير فيه هلبا، وتزرع فيه في أمل هلبا، حاجة قادرة تمنحه شعور كامل بالحياة، لأنه بموهبة عطاهاله ربي في إيديه وروحه وقلبه قادر يمنح الجوامد حواليه لمحة حياة ..
أيلول 2019 - أيلول 2022 ولـ هلبا سنين ثاني بأذن الله ..
