قصيدة اساس ليلة 3 محرم خايفه يروح الضعن ويردلي خالي خايفه أتر | الشاعر امجد الشطري

قصيدة اساس ليلة 3 محرم

خايفه يروح الضعن ويردلي خالي
خايفه أترد عمتي وماعدها والي
كون نفس الفاركوني
للوطن كلهم يجوني

1
آنه ياناس العليلة أهلي ما أنساهم
خايفه يرحون مني وبعد وين الكاهم
ضلتي بالدار صعبة كون اروح وياهم
آنه متعودة عليهم مكدر بلياهم

عيني مشبوحة بدربهم ليلة ليلة
همه مايدرون بأحوال العليلة
يمته تنظرهم عيوني
للوطن كلهم يجوني


2
عشت وي أهلي سعيدة وما أحس بهمومي
وجان وياهم عجيبة بسرعة يخلص يومي
من سمعت حسين كلي للموادع كومي
رحت ملهوفة الغرفتي كمت ألم اهدومي

كتله بويه ابهل مسيه وياك أخذني
شلون أودعك وأنت مأخذ كلشي مني
ما أريد يودعوني
للوطن كلهم يجوني



3
عشت كل أيام عمري أبيت أبويه الغالي
وجان غير البيت هذا كلشي مايحلالي
جنت يم الباب اكعد من يجيني الوالي
والله وسفه اليوم غربة بيت أهلنا وخالي

جنت يم عبد الله اكعد يم رقية
هسه بس صوت الصدى يرجع عليه
وين أهلي الضيعوني
للوطن كلهم يجوني


4
هاي ياطفلة التقاوم هل العذاب القاسي
هجر تفكير ومشقة وحتى مات إحساسي
لاتسالوني عليمن (ليش شيب راسي)
راحو إعزاز من أديه وخذو كل أنفاسي

المثلي هسه آنه تنام بحضن أبوها
المثلي أهلها بهذا عمري يدللوها
ما اضن يعوضوني
للوطن كلهم يجوني


5
اليرحم بدلالي وينه وينطفي جمرة ناره
لليجيب أخبار منهم والله أنطي أبشاره
وصلو للغالي سلامي خل يعود الداره
كافي روحي تعيش غربة وبالدمع محتاره

قلب البنيه على الوالد حنينه
هاي إلي جم يوم أنه وروحي حزينة
الاحبهم عذبوني
للوطن كلهم يجوني


6
صرت من كد انتظاري ياخلك محنية
ايست وأهلي الغوالي ماوراهم جيه
لن أجه بشر ويكلي عمتج مسبيه
كتلي والغالي يكلي شيبته مدميه

لا خيم ظلت يكلي ولا حماية
بس حرم يافاطمة وراحت سبايا
للمصايب سلموني
للوطن كلهم يجوني

شطره
امجد صاحب الشطري

https://t.me/oydgh