قصيدة اساس ليلة 2 محرم أول شخص حبيتك مثل الهوى شميتك كل لحضة | الشاعر امجد الشطري

قصيدة اساس ليلة 2 محرم

أول شخص حبيتك
مثل الهوى شميتك
كل لحضة من سنيني ادعي ودمعتي بعيني
خادم إلك خليني

1
خادم تحت أمرك عايش على ذكرك
كل عمري خلصته وياك

ما افترك عنك عمري بده منك
يابو علي آنه بحماك

ماريد شي من دنيتي بس خدمتك هاي
اقبلني وقبل خدمتي مرة يمولاي
أتشرف آنه بمجلسك لو وزعت ماي

لو أخدمك كل عمري
ما وافي حبك ادري
بس نظرتك تكفيني ادعي ودمعتي بعيني
خادم إلك خليني


2
شهر الحزن لو هل بدموعي أتوسل
والبسهن أثياب الإحزان

انعه لقطع نحرك وجروح الــ بصدرك
ويلي على المذبوح عطشان

شلون ابخل بدمعي انه وأنت على الرمال
شلون ابخل بلطم الصدر وصدرك صفه وصال
شلون ابخل بالبس السواد وسلبو عيال


شهر الحزن لو مرني
يذبحنـــي ويألمنــي
والحسرة من تجويني ادعي ودمعتي بعيني
خادم إلك خليني


3
جمرة إلك بيه مشتعلة يومية
ماتنطفي بقلبي يحسين

مصابك ولا صاير بصدرك إلف حافر
ياعين توفي إلك ياعين

راسك يلوح أعله الرمح والضلع مكسور
والسهم نابت بالجبد والصدر محفور
ياعين توفي بالدمع بيام عاشور

شما عيني صبت يمك
متساوي قطرة بدمك
كل يوم من سنيني ادعي ودمعتي بعيني
خادم إلك خليني


4
بدونك شلي بعمري يلي أرفعت كدري
سويتلي قيمة بالناس

نطيتك فقط دمعة وحصلت هل الرفعة
منك ومن الكمر عباس

شكراً وألف شكراً على القدمته إليه
بس هذا مو همي يبو الروح السخية
كل همي أمك فاطمة ترضه عليه

والترضه عنه الزهرة
وكت المنية أتحضره
خاف الأجل يلفيني ادعي ودمعتي بعيني
خادم إلك خليني


5
مهما الزمن يفتر والدنيـا تتغير
تلكاني واكف على الباب

لاطمع يبعدني ولا أمر يرهبني
خليها هاذي بالحساب

أول محب لو عسرت تلكاني يمك
لو وحدي اظلن ما أهم يحسين أخدمك
غير آنه بيك اتولعت من فدوه لاسمك

آنه أقسمت للتالي
ماخالفك يالغالي
همه وعزم تنطيني ادعي ودمعتي بعيني
خادم الك خليني


6
قبرك الي جنة يابـو علـي اتمنه
يمك أجي واجري الدموع

محروم انه هواية ما امشي مشايه
دربك يبو اليمه مكطوع

قلب اليحبك سيدي شيطفي ناره
يايوم بالله ينفتـح درب الزيارة
مشتاك أشم عطرك وصد أعله المنارة

جم روح إلك مشتاكه
بالله شوكت نتلاكه
مديت الك جفيني ادعي ودمعتي بعيني
خادم الك خليني

شطره
امجد صاحب الشطري

https://t.me/oydgh