اكلت بحيث مداحس ع روحي يضحك ويسولف هناك وكال رهف الغلط منج . | عمر

اكلت بحيث مداحس ع روحي يضحك ويسولف

هناك وكال رهف الغلط منج .لا تزعلين مني
رجلج مو خوض ادمي
اكسبي ترة احنا الرياجيل مو بهاي الصعوبة
ولا تكبرين الاشياء ولا تكونين سلبيه. .
يعني شوفي هو وين الخلل .

يعني اني متاكد رجلج من النوع شافج فقيرة وطغى
وكذلك عيالج ..
يعني نرجع الخلل منج ماكو صد ماكو كلمه قوية كله اي ونعم وحاضر

شوفي صح يجوز اصغر منج بسنوات بس هاي الحياه علمتني كل شي

وعلمتني كل شي ناخذة بفرح يدوم
وهذا الحزن الي بي انتي انتي معيشة نفسج بي
ابسط شي اولادج ..
انتي فسحتي المجال غيرج يدخل ..

اكسبي اولادج ..واكسبي رجلج والباقي مو مهم ..

كتله ميتقبلوني ..

نزل الاكل ..اهوووو بابا حاولي شنو ميتقبلوني ترة انتي مو مرت ابوهم امهم امهم

جبتيهم وسهرتي وتعبتي
شاركيهم حياتيهم ..

رهف لحد هسة الخلل منج
ولو هم ظلام بس شلون واحد يدكون بابه ويفتح الهم
الباب انتي هيج سويتي

داحجي قاطعني ...

كال اعرف ازوجتي صغيرة واعرف ..كلش زين اهل٠ مو خوش
بس الحياه اتعلم كل شي اتعلمي
لا تضلين ادورين بنفس المكان ..

يلا كملي اكلج ..

غير كلامه وبدا يحجيلي عن نفسه وحياته

كملنه اكل وطلعنه ..
كال راكبه الباص انتي ..

كتله لا ..
كال امشي ..عندي تذاكر ..

وكف الباص وصعدت وصعد خالد ورايه..






كعدت وهو مقابيلي وكف
يباوعلي ويبتسم....
اباوع عليه وادنج ..

هو مابطل مستمر يغمز ويضحك...

كتبتله كافي خالد الناس منا...

رجع دزلي وشسويلهم...

والله الواحد حر وبكيفي اباوع اغمض ...
ويسوي حركات يضحكني بيها

وصلت ..

ضحك بوجهي ونزلنه
..

رحت امشي للبيت جريت الفوت اريد اشوف شكد الساعه اني ناسيه نفسي ..
اباوع الشحن خلصان ..
كمت امشي سريع .
طبيت للبيت
اول ما باوعت ع الساعه الي الوكت كل تاخر بيه واني محاسه بروحي
دخلت جو.
اشوف الولاد جايين من الدوام وكاعدين يم عمتي..

ومروان..موجود
صاير نار
وين جنتي رهف

كتله اتمشي شبيك...

وين جنتي دايحه .

كتله يا دياحه . اتمشى ضايجة ..

ايي دياحه مره لي تطلع بدون علم زوجها وتعوف عمتها المريضه واولادها
هاي دايحه اضاهر نطيتج عين زايده
ويرادلج تربيه من جديد..ضايجة من شنو خانم شو كل شي كامل الج ..وجاهز ..
شتريدين يوصل الج ..

مروان اني مو طفله وجاي تهيين بيه..شبيها تربيتي
لا تحجي عليه.

الاولاد بالمدرسه
وعمتي عدها معينه
وانت بدوام
طكيت متتت ختنكت
من اربع حيطان
بشررر اني بشررر احتاج اشتم هوى
خبلتوني كاافي حرام عليك
ولو يوم حس بيه حس بتعبي
حس اني روح
حسبي الله ونعم الوكيل بيكم
دمرتوني...

كال تدعين وتحسبين ولج ع شنو ملكه عايشة هنا نسيتي خيسة اهلج شارعكم متنطب بي سيارة
اخذتج صرتي ادميه رررهف ..
الف وحدة تتمنى مكانج هذا ..
ساعه امك ساعه اختك
انتي اصلا لاهيه عن الكل ..

كتله تمام ..ابقى هين واحجي واحجي تعبت

اني وياك خلص هذا حدنه

اي اطلعي دام بهدومج روحي لاهلج ..

عفتهم وطلعت

لو عندي اهل ينشد بيهم الضهر..ارجع الهم والله ولا هل الذله الي بيها اني كل حجايه انطرد ..

مشيت وين اروح اذا اروح ع مروان راح يكول هاي مصدكت .
لا اروح لاسماء ..لا عي رجعت لبيتها ..

طلعت تلفوني..شحن ماعندي ..
وين اروح ..
رحت للماركت ..
حجيت وياه عندك شاحن
واباوع ع الكوفي اخاف ..خالد يشوفني ..
..بس نقطه شحن صار بي خابرت اسماء
رن رن
الو هلو قلبي
هلو رهوف
اني تعاركت ويا مروان...
وماعرف وين اروح
تعالي ع هذا العنوان حدزلج بمسج..انتي شوفي للتكسي يوصلج باب شقتي ..

ونتفاهم
تمام
باي
باي
سديته اخذت بطل مي وطلعت ..
من الماركت ..
بقيت واكفه انتظر تكسي اني هوايه اتاخرت نسيت نفسي اصلا
مثل العصفور وانفتح اله الباب طار بدون ميندار ويشوف شنو الي وراه ..
هيج طلعت ..






بقيت واكفه ..اني لوما كلام خالد يمكن ما احجي بيوم وما اتجرء وارد مروان

ارجع للبيت هذا غلط الي سويته.

لا ما ارجع ..خلي يحس بيه شويه ..

وكفت تكسي..قبل لا اصعد
اشوف خالد بقيت واكفه مصعدت ..
خالد
..واكف بالباب ويدخن .....
واجتي وحدة يمه ..بس بعيد بس شعرها اصفر مبين ..
وتقربت منه وباسته من خدة
بقيت فاتحه عيوني كلها ..

هاي شداشوف ..خله ايدة ع جتفه ومشى هو وياها.
بقيت جامدة بمكاني ..
حسيت الرجال يحجي ويايه ..

وعيت ع نفسي وصعدت وياه ..

صافنه واتذكر لي شفته
معقوله خالد هيج يسوي
زين اني شعليه
ليش داحس بركان نار يشتعل بيه
ليش دافكر بي
خلي يحضنها ويبوسها شعليه
ورجع اكول ليشش هيج سوه
هو مو كالي احبج مو عترفلي بمشاعره