بوست مهم جدًا، بل في غاية الأهمية :')) عبادة قيام الليل ! ١ | رَضيت بالله رباً💛
بوست مهم جدًا، بل في غاية الأهمية :")) عبادة قيام الليل !
١- لازم تبقى شايف عبادة ( قيام الليل ) بالذات بمثابة جهاز التنفس الصناعي بتاعك اللي من غيره كل حاجة معرضة للإنهيار و الرجوع لنقطة الصفر
٢- قيام الليل بنسبة ٩٠٪ هو أهم أدوات السعي لأي حاجة انت عايزها كل المعجزات و الحاجات العظيمة اللي حصلت لك، و الدعاء اللي استُجيب، و الأزمات و الكروبات و الابتلاءات اللي خرجت منها مُعافى ..... هتلاقي إن قيام الليل كان أكبر و أهم سبب فيها
٣- فكرة الخلوة بالليل بنفسك و الناس نائمة من حولك و أنت قائم تصلي و تدعي و تبكي كفيلة إنها تصلح أي حاجة باظت عندك (نفسيًا و معنويًا و ماديًا)
٤- قال أحد السلف ( أتعَجبُ ممَّن له عند الله حاجة، كيف ينام وقت السحر!؟ )
٥- ركعات القيام اللي بتصليهم لله في كل ليلة هما حائط الصدّ بتوعك قدام الفتن اللي بتعصف بالناس كل لحظة و دموع السجود في قيام الليل تُطفيء كل حُرقة في قلبك (حُرقة الهزيمة .. حُرقة الفقد .. حُرقة الظلم .. حُرقة انكسارك)
٦- مش ضروري تتقيد في قيام الليل بنظرتك له في رمضان .... يكفيك ربع ساعة أو تلت ساعة فقط من الليل تركع لله فيهم ٤ ركعات، أو ٣ ركعات، أو ركعتين، أو ركعة واحدة فقط تقرأ فيها قل هو الله أحد
احفظها جيداً :
- سهام الليل لا تُخطيء الهدف أبدًا حتى و إن لم تُصبه إصابة كاملة
- ولعل دعوة خرجت منك في جوف الليل سمعها الله و أصابت ما تمنيت، لو كُنت أنفقت ما في الأرض جميعًا لم تكن لتُصيب!
و الكلام الجاي ده ليس فقط لعبادة قيام الليل، بل للنوافل بوجه عام، فمثلا: لا يصلي قيام الليل لا يهتم بالسنن الرواتب لا يصلي ركعات الضُحى لا يردد أذكار الصباح و المساء في وقتهما لا يصوم أيام تطوع لا يحفظ و لو ٥ آيات فقط يوميًا
لو فتّشت في حال أي منتكس، أو شارد، أو عاوز يقرب و مش عارف، أو تائه ... هتلاقي إن المسكين لم يُحِط على فرائضه بسياج حديدي من النوافل المذكورة أعلاه، فأصبحت معركته مع الشيطان مش مع النوافل ( اللي ينفع التفاوض عليها ) لا ... بقت معركته مع الشيطان علي الفرائض و اللي للأسف بتكون معركة سهلة عليه لأنك مش مأمّنها بأي سلاح من أسلحة النوافل
و لذلك رُوي عن أحد العارفين قال : ( من فرّط في النوافل ابتُلي بترك الفرائض )
واحفظها عنّي ( النوافل سدود في وجه الإنتكاس و سكرات الضياع .. فاجعل لك نوافل يومية لا تُفرّط بها مهما كان حال قلبك و مهما كثرت عليك الذنوب )
و نقول تاني
قيام الليل في سطور:
- قيام الليل يبدأ فعليا من بعد صلاة العشاء حتى آذان الفجر ... و أفضل أوقاته بعد الساعه ١ صباحًا ( الثلث الأخير من الليل ) اللي بيسهر و غاوي سهر، يأجل القيام في آخر نص ساعة قبل الفجر والوقت ده يُسمى (وقت السَحَر) و توقيت صلاة القيام عمومًا فيه سِعة فلا تُضيّق على نفسك
- عدد ركعاته كما جاء عن النبي -صلي الله عليه وسلم- ١١ ركعة ( ٨ قيام + ٣ وتر ) و لكن العلماء أوجدوا سعة في عدد ركعات القيام ( يعني معاك من ركعتين لحد ٢٠ ركعة و أكتر... على حسب جهدك و همّتك )
- صفة صلاة القيام مثنى مثنى ( ركعتين ركعتين ) ركعتين و تسلم .. ركعتين و تسلم ... و هكذا
- صلاة الوتر ٣ ركعات ... تُصلَّى بعد القيام ( أيًا كان عدد ركعات القيام اللي صلِّتهم )
لازم تختم بالوتر ( في الحديث: اجعل آخر صلاتك من الليل وترًا )
ممكن تصلي الوتر ركعة واحدة فقط بدلًا من ثلاث ركعات في حالتين: ١- إن خشيت دخول آذان الفجر ( داهمك الوقت يعني ) ٢- إن كان بك عارض من مرض أو إرهاق أو خمول
جائز أن تكتفي بصلاة الوتر فقط بدل القيام، و تُكتب عند الله من القائمين إن شاء الله ...و لكن الأفضل أن تُصلي ركعات القيام ثم الوتر
- السُنة أن تقرأ في ركعات الوتر الركعة الأولى ( سبح اسم ربك الأعلى ) الركعة الثانية ( قل يا أيها الكافرون ) و الركعة الثالثة ( قل هو الله أحد )
و لو هتصلي الوتر ركعة واحدة ..تقرأ بردو ( قل هو الله أحد ) و يُستحب أيضًا التنويع في القراءة لأن من السُنة تغيير السُنة
- فيه فرق بين القيام و التهجد القيام أن تصلي من الليل دون أن تنام، أما إن نمت و قُمت من الليل تُصلي فهذا يُسمى تهجدًا ... وكلاهما خير
- بعد الختام من الوتر: تردد ( سبحان الملك القدوس .. سبحان الملك القدرس .. سبحان الملك القدوس رب الملائكة و الروح )
- اللي صلى الوتر مرة ميصليهوش تاني ... (لا وتران في ليلة) و يُستحبّ إنه ميصليش حاجه بعد ركعة الوتر
أسأل الله العلي العظيم أن يهدي قلبي و إياكم و يكتبنا عنده من عباده القائمين
