2022-06-17 21:34:42
ضحكوا عليكِ وطلَّعولك موضة انك تبيني حواجبك من النقاب "أصل مناخيرك وبوقك متغطيين فيها ايه يعني اما تبيني حواجبك؟!"
ضحكوا عليكِ وعملولك بناطيل "أصل العبايات والهدوم الواسعة بتبهدلك فى المواصلات!
ضحكوا عليكِ وقالولك إن لسه العمر طويل معاكِ، وبعدين نبقى نتوب!
ضحكوا عليكِ يا بنت آدم وحواء وانتِ ماشية وراهم من غير أي تفكير ولا حساب لآخرتك..
بكل بساطة للأسف صدقتيهم لما قالولك ان الزمن بتاع الرسول صلى الله عليه وسلم والصحابة غير الزمن بتاعنا "كإنهم أستغفر الله العظيم بيقولوا ان الدين بتاعنا غير الدين بتاعهم "
ربنا لما كان بيذكرك فى القرآن، متكلمش أبدًا عن الدريس، ولا عن الطرحة القصيرة، ولا عن البنطلون!!..
ربنا بنفسه عز وچل متكلمش غير عن الجلباب، والخمار، والنقاب.
اقرأي كدة حبيبك بيقول لك إيه
( يَا أَيُّهَا النَّبِيُّ قُلْ لأَزْوَاجِكَ وَبَنَاتِكَ وَنِسَاءِ الْمُؤْمِنِينَ يُدْنِينَ عَلَيْهِنَّ مِنْ جَلابِيبِهِنَّ ذَلِكَ أَدْنَى أَنْ يُعْرَفْنَ فَلا يُؤْذَيْنَ وَكَانَ اللَّهُ غَفُوراً رَحِيماً ) سورة الأحزاب/59
ربنا عالم إنك هتتأذي لو ملبستيش اللبس الواسع، الفضفاض اللي مغطي كل حتة فيكِ، عالم إنك هتتأذي من نظرة راجل مليانة أفكار ربنا وحده اللي عالم بيها، عالم إنك هتتأذي لما راجل صالح بيدور على زوجة صالحة وتبقي أنتِ بنوتة اللهم بارك جميلة، وقريبة جدًا من ربنا بس بسبب لبسك خليتيه ياخد عنك فكرة إن زيك زيهم! عالم إنك هتتأذي لما تعدي من قدام شوية شباب ويفضلوا يتكلموا مع بعض عن كل حتة فى جسمك
بتعملي فى نفسك كدة ليه؟!
كل دا عشان شوية زينة، وتبقي شيك ومحدش يعلق على لبسك ويعقدك فى حياتك!
طب هقولك
بالنسبة للزينة والشياكة وهكذا مش هقول لك بقى اتزيني فى البيت ولا الكلام دا لأن كلنا عارفينه، لكن هقولك إن جسمك اللي عارضاه لأي حد دا الدود هياكله فى الآخر، وهنلبس كلنا الكفن اللي هيكون ساتر للجسم كامل، طب ما نلبسه النهاردة وناخد أجر، بدل ما هنلبسه بكرة غصب عننا واحنا بنتكفن وملناش أجر كمان لأن وقت عملنا في الدنيا انتهى، وبدأنا رحلتنا للدار الآخرة!
يبقى ليه بقى مغطيش جسمي دا بأغلى حاجة ربنا رازقني بيها وهي "الحجاب الشرعي اللي حبيبي أمرني بيه"
وبالنسبة إنك لو لبستيه أهلك والناس هيعقدوكِ فى حياتك، فانا عايزاكي تتخيلي بس كمية الحسنات اللي بتاخديها بسبب كلامهم، وأنتِ تقولي لا يارب انا هثبت عشان ترضى عني؛ لأني عارفة إن محدش فيهم هينفعني أبدًا لا فى دنيتي ولا فى آخرتي.
وفي الاخرة بقى
"يَوْمَ يَفِرُّ الْمَرْءُ مِنْ أَخِيهِ (34) وَأُمِّهِ وَأَبِيهِ (35) وَصَاحِبَتِهِ وَبَنِيهِ (36) لِكُلِّ امْرِئٍ مِّنْهُمْ يَوْمَئِذٍ شَأْنٌ يُغْنِيهِ (37)" سورة عبس
يبقى انا ليه بقى أمشي وراهم؟!
أنا كل اللي يهمني فى الناس هما أهلي، ولازم أرضيهم، بس مسمعش كلامهم فى الحرام، وأفضل أعافر معاهم بكل احترام إني أعمل الصح، واللي ربنا أمرني بيه مش استسلم بقى، وتقول أصل أهلي مش موافقين "دي الفردوس الأعلى ولازم نحارب عشانها ولا إيه؟!"
آخر حاجة هقولها لك شوفي انتي عايزة تبقي من أنهي فيهم
"وُجُوهٌ يَوْمَئِذٍ مُّسْفِرَةٌ (38) ضَاحِكَةٌ مُّسْتَبْشِرَةٌ (39)
وَوُجُوهٌ يَوْمَئِذٍ عَلَيْهَا غَبَرَةٌ (40)" سورة عبس
ناس وشها هيبقى منور وفرحانة جدًا بالفوز العظيم اللي ربنا كافئهم بيه على أعمالهم الصالحة، وناس هيبقى وشها مليان سواد وغم وحزن من العذاب اللي هيشوفوه
الحقي نفسك وسيبك من الدنيا الفانية دي، والله العظيم فانية وما هتنفع حد فينا!
لصاحبته
98 viewsأُم مَـريَـم.. , 18:34
ر
