#ويبقى_الحسين انه زينب عزيزة بزود اخوتي وراسي عالي ض | الشاعر سيف الخفاجي
#ويبقى_الحسين
انه زينب عزيزة بزود اخوتي وراسي عالي
ضوه شمس وكمر ليل وصبح طر من خيالي
طيحتي رمح وعليه راس حسين
طيحتي عين وسهم والجفين
طيحتي طيحتي
...........................................
بحر حزني بجرف همي ضلام بگاع متبدي
طريق بعيد الم دموع ومايعطش ابد خدي
ليلة وبيهه شح الصوت
وحجي عيوني كله حسين
شلمك والنوايه هواي
اجت هاي السيوف منين
دبرلك عذر باجر تره محتاجة عذرك
كلي جم رمح باجراشوفنه اعله صدرك
ياهو الي.. باجر اذا طولك طاح
ياهو الي.. لو مطرت الخيمة رماح
طيحتي
....................................
يجي باجر تغيب انته
يكون اولا شمس تطلع
يصيح حسين لا تبحن
بجيجن باجر امربع
متني وراسي مايبقن
شمس باجر تخلف سيوف
الدنية الماتشوف حسين
تفز لمن تطيح جفوف
القدر راسم الي راس برمح نار وسباية
الطف باجر بداية تبتدي لل لا نهاية
كربله ..لا زم تطش بيهه دماي
كربله ..نطعش يشح النه الماي
...................................
كشف وجه الصبح لونه ورقية تخاف من الدم
احمر حته لون الكاع الهوه مخنوگ ماينشم
صارت نعمة الله تطيح
بلايه اسم الله فوك الكاع
وماكو ملاگه ويه السيف
الرگب جانت حجيهه وداع
انجنو والعقل بحسين اذا تنجن دليلك
الشمس تصرخ يبو الاكبر ابقه لو اجيلك
حيرته ...لمن عله عيوني اندار
حيرته ..ذابل اجاني ومحتار
طيحتي
.................................
وكف وكفه هوه ومحتار والجيش اعله شوف العين
نبل وارماح السيوف هواي وكلهه تريد جسم حسين
مشه مشية تراب بريح
من ايطش ولا يلتم
وانسدت بعد ماشوف
بس بس صوت الطبر والدم
وعله متون العبي دمك تطشر من اديهم
شلمك واليتامه انطشت ومحتارة بيهم
التفت ..نار وساط وايتام
التفت ..جسمك ترس طوله سهام
................................
اجيتك اركض اعله ال اخ وشمرو راسك بحضني
تراب ودم صبغ وجهك مغمض مستحي مني
وامسح لحيتك بيدي
واقبل الراس واشتمه
واكول اعله الرمح ينشال
خاطر يكشخ بدمه
الحجر شفتك مردهه ودمعي بجروحك بجيته
اجيت اركض عليك وتالي بس راسك لكيته
خويةليش... كوم الخيم حركوهه
خويه ليش... بخيل ايتامك سحكوهه
طيحتي
.............................
شفت صدرك تدوسه الخيل بحوافرهم وصل منك
خلوك اعله طول الكاع ونفس فحطان اسمعنك
شفت خنصر ابين الخيل
بلا محبس وكع خجلان
ماضل كل اثر منه
حسين اتطشر العطشان
اركض والزراك بمتني ساترته العباية
اطيح او اوكف وتركض يتاماك ابوراية
وانجفي... وابمتني جم سوط ايطيح
وانجفي... رايه وهوه بحلك الريح
طيحتي
.................................
سيف الخفاجي
#لك_الفداء_سيدي_اباعبدالله
#خدر_الفواطم_لنشر_القصائد_الحسينيه
________________________
لمن يجد صعوبة بالحن اطلبه من
@moatmed1
