بكل يوم لازم اكو شي يضوجك ويزعجك، إحجاية سمعتها من شخص تعرفه ا | فَكِّرْ
بكل يوم لازم اكو شي يضوجك ويزعجك، إحجاية سمعتها من شخص تعرفه او متعرفه وغثتك، صديق وكع من عينك، عائلتك مانعتك من شي تريده، حبيب شالع گلبك، دراستك مبزعتك من الحياة، هرمونات جسمك الما منتظمة بسبب حالتك النفسية وقلقَك وتفكيرك، المزاج الأسود المايرضى يتركك، انتَ وتضحك تتذكر موقف حزين تسكت وتتكئب، حجاية حلوة ومشاعر حقيقية وموقف مُشرّف قدمته لأحد نكره وما غزر بي وخلاك تتندَم، رسالة او تعليق اجاك خلاك تكره حياتك ووضعَك وحتى شكلَك وجسمك، ذني التفاصيل تصير بالكل يوميًا او بين يوم ويوم، اني مجاي أطبطب على راسك هسه واكلك حبيبي حياتي عادي لا تهتم عادي لا ترُد، انسى وماعرف شنو، لا لأن الموضوع فعلًا مزعج.
ضوج وأحزن بس لا تطوّل، خلي ضوجتك سريعة وحزنك سريع، وراك وقت أهَم من أنُ تضيعه بالتفكير والندم، وهذا ليش كلي هيج وهاي ليش كلتلي هيج، لتخلي هذني التفاصيل تستهلك طاقتك وتستنزف قدرتك على الإستمرار من يكلولك ما تكدر تكمل او مستحيل توصل لحلمك وانتَ امكانياتك ضعيفة ويحبطوك فدنوب الوقت الراح تستغرقة للحزن بسبب كلامهم، إستغرقة بالإستمرار بتحقيق هدفَك والسعي للحلم وقتها راح تنحل كُل مشاكلك، حتى العاطفية.
(لا تنطي للظروف الصعبة وللمواقف السيئة وللكلام المو حلو أكبر من حجمهن حتى ما يأثرن عليك ويبعدنك عن هدفك، عيّش وإستمتع وكُن متأكد اكو رَب فوگاك بالمرصاد لكل شخص يعكر مزاجك، رَب يحبك ويحميك دائمًا ويحب يذكرك بشوية من كلامه ويكلك ( إِنَّ اللَّهَ يُحِبُّ الْمُتَوَكِّلِينَ ) ويرجع يكلك إِنَّ اللَّهَ يُحِبُّ الْمُتَّقِينَ ويرجع يكلك ( وَاللَّهُ يُحِبُّ الصَّابِرِينَ )
