السَلام عليكم كلامي موجَه خصيصًا للآباء والأمهات ولكل شخص عند | فَكِّرْ
السَلام عليكم كلامي موجَه خصيصًا للآباء والأمهات ولكل شخص عنده أخت صغيره بالعمر (طفلة). وحتى اذا طفل.
بعد التحيّة.
أهم نقطة لمقاومة عدوَّك هو معرفتَهُ، وهذا المجتمع يا اخواني الله يحفظكم ويستر عليكم، مجتمع تعبان من ساسه لراسه، مجتمع يعاني من كل حالات الإنحطاط الأخلاقي والعقائدي والديني يعاني من كل الحالات النفسية، مجتَمع لا يؤمن بإنسان ولا يخيفه قانون ولا يردعه دين، نعم بالضبط غابة نفس ما تكول عليهم حضرتَك وره كل مصيبة وفاجعة تصير.
إلي داشوفه أنّ الآباء والأمهات ديسمحون لأطفالهم (بجهل او بإهمال) أن يلبسون لبس والله ماعرف شلونه، لبس يقتل كل معالِّم الطفولة والبراءة بيهم، لبس يجذب النظر بدرجة كبيرة وخاصةً للفئة الشهوانية الطايح حظها بهذا المجتمع، بسبب هؤلاء الأهل ديزيد معدل البيدوفيليا، دتكثر الحالات الي مانريد نسمعها ولا نريد نشوفها، ديلبسوهم لبس دلاعي كله خلع بخلع وهمه اطفال بيض ويخبلون وعبالك ملائكة الله يحفظهم يارب، راح تكلي لعد خمن يلبسوهم عباية ونقاب وهمه اطفال!؟ واني اكلك لا،،،، العباية والنقاب والحجاب تتبع البيئة الهمة بيها، تبقى حريّة الأهل بذلك، ولكن من يكون الموضوع خلع ودلع لأطفال ! هنا همه ديسببون بأذيتهم وهاي متعتبر حرية شخصية.
الي اكولَه خلي لبس اولادكم معتدل، متوازن، ومنطقي، لا تخنكوهم كلش ولا تخلوهم يلبسون لبس سفردحي، لتخلون بسبب غبائكم يتكاثرون ذولة الحيوانات السائبة من البشر (مشتهي الأطفال) أني مُجرَد رجل دا أنقل الديصير كدامي من ارض الواقع واجي أكتبه هنا. رجاءً ركزوا على هذا الموضوع وأنطوا اهمية بالغة قبل لا تصير فاجعة لإبنك او بنتك وتبقى تلوم بنفسَك، يوم لا ينفع لوَم ولا نَدم.
