تتفق معي أو تختلف الزيارة الأربعينية هيّ أهم حدث سنوي بالعالم | فَكِّرْ
تتفق معي أو تختلف الزيارة الأربعينية هيّ أهم حدث سنوي بالعالم عامةً وبالإسلام خاصةً اني ما راح داخلك بمقارنةً او تحدي ويه أحد، ولكن جيبلي ديانة تسوي نفس اليسووه الشيعة "الحقيقيين المخلصين" جيبلي بغير طائفة مئات الألاف من الناس يتركون عملهم وسكنهم ومنطقتهم ومصالحهم ويرحون بأماكن بعيدة وينامون بالشارع ويشتغلون 24 ساعة حتى يوفرون أكل وشراب ومكان مريح وخدمة، كل ذني بشكل مجاني يقدموها لزوار يقطعون مئات وعشرات الكيلو مترات علمود شخص إستشهد قبل 1400 سنة، وتشوفهم يتراكضون فيما بينهم على خدمة الزوار، ويضوجون كلش اذا الزائر جان مستعجل وما وكف بموكبهم.
الموضوع أعمق بكثير من كونَه زيارة إعتيادية او مجرد اشخاص يمشون وهذا هو، موضوع روحاني عقائدي أكثر من كونَه حدث موسمي.
شياب كبار بالعمر، عجائز، أطفال، مُعوقين، مرضى، وآلاف الحالات، مستمتعين بالديسووه ويعبرون أقسى الطرق وبدرجات حرارة صعبة الإنسان الطبيعي يتحملها، ويبقون أيام وليالي يمشون، علمود يزورون الإمام الحسين عليهِ السلام، موضوع يستحق الفخر وبشّدة.
بغض النظر عن الشوائب التصير بهذا الحدث، بغض النظر عن ملاحظاتي الشخصية للعديد من الأمور الي اشوفها غير ملائمة بالزيارة، ولكن الفكرة بحد ذاتها فكرة عظيمة وغير موجودة لدى أي مذهب او ديانة أخرى، لا في السابق ولا في المستقبل.
حفظ الله الزائرين "الحقيقيين والمخلصين" وأدامهم الله على منهج الإمام الحسين "فكرةً وعقيدة"
