تحية حب وإحترام وتقدير وشُكر وعرفان لكل أم وأخت تشتغل بالمطبخ | فَكِّرْ

تحية حب وإحترام وتقدير وشُكر وعرفان لكل أم وأخت تشتغل بالمطبخ بهل حر وتسوي أكل لأهلها، شخصيًا اعتبر الموضوع بطولة وتضحية لازم الواحد يوكف إجلال وإحترام و(تقدير) إلها.
كل المطابخ بالعراق حاره واغلبهن حتى بنكة مابيهن، والجو اصلًا مشتعل، وكل هذا وهنه واكفات كدام عين الطباخ ويسون أكل لأشخاص كاعدين كدام المبردة او السبلت.
صحيح هذا واجبهن، بس هنه هم بشر وهم يحسّن بالحر وبالتعب وبالحيرة مال الطبخ يومية، وغسل المواعين والتنظيف والوكفة بالساعات.

أرجو من كل شخص يكدر يساعد أمه او اخته لا يقصر وياهن، ولا يحس كبريائه ورجولته بخطر اذا سوه هيج، بالعكس هالمساعدة ما تنزلك بل ترفع من شأنك كدامهم وكدام الله.
وكذلك أتمنى من كل بنية تبقى نايمة للظهر وتنزل تلكى الاكل جاهز، انُ تعيد نظرها بنفسها بالخصوص بهل فترة مال حر.

امك وأختك هم ناس مثلك، مو خدامات جايبهن بفلوس علمود يحللن خبزتهن، أمك واختك لوما يحبنك يبقنّك معفن وجوعان طول العمر، فلا تبخل بالمساعدة.

وكلكم عيوني.