عمار هليل الواسطي

2022-07-04 18:38:40 ليلة ٥ محرم الحرام { مسلم بن عقيل ع }
قصيدة ( إشعاع الثورة)

يلدمك إشعاع الثورة ونبراس بدرب الأجيال
أول قطرة السالت منه رسمـــت للدين الآمال
دمك مسند ... للطف حدد
منهاج الحق للأبطال
...........................................................................................................

يمسلم كتبت الأيام قصة مجدك الخالد
يلمنصّب سفير حسين بالكوفه صرت قائد
وحدت الصفوف هناك خليت الزمن شاهد
ثقة انطاك الحسين وبيك راد يوضح شرايد

توكلت اعله الباري بدربك واضح أمرك بالمعروف
للكوفه تعنيت بزودك طبيت ووحدت اصفوف
أول مشهد ... للطف حدد
منهاج الحق للأبطال
...........................................................................................................

الناس تعاهدت وياك ما تترك نهج دربك
لچن هاجس بقه عندك ما مرتاح أبد گلبك
چنك تعرف يغدرون بكرامة خالقك ربك
بقيت الوحدك فعلاً بدون الأعلنوا حبك

نقضوا بيعتهم يا مسلم عكست وياك الأيام
صرت مهدد من الظالم وانته الناصر للإسلام
فكرك أبعد ... للطف حدد
منهاج الحق للأبطال
...........................................................................................................

يمسلم ثورة الإصلاح ما راد الظلم تكمل
مثلت الحسين وبيك مكارم طبعه بالمجمل
فوضت الأمر لله رضيت بكل أمر منزل
ما ساومت لا والله وانته الثائر الأول

لمن دمك أصبح مطلب يا مسلم من إبن ازياد
أول خطوه هنانه إنرسمت خطوه بتاريخ الأمجاد
ربك يشهد ... للطف حدد
منهاج الحق للأبطال
...........................................................................................................

بالكوفه انكتب تاريخ منه الناس مفجوعه
صدى صرخة ضمير الحق بقت لليوم مسموعه
زلم خانت وعدهه وياك وحرمه ونصرتك طوعه
تحشمك تشهر البتار بقت والهامه مرفوعه

واتذكرك صولات الوالي عمك حيدرنه الكرار
وتريد البتارك يصبح يا مسلم چن ذو الفقار
كلشي اتأكد ... للطف حدد
منهاج الحق للأبطال
...........................................................................................................

شيمت غدر بالعدوان تعرف بيهم يغدروك
هضيمه وفاجعه بحبال تالي سيدي يسحبوك
مشهد مؤلم لكل حر وين الچانوا ينصروك ؟
ورغم كل الحصل ظليت الك أنصار ويذكروك

من قصر ابن ازياد وسطحه شمروك وما عرفوا بيك
ربنا الرايد يرفع شأنك ما تنزل تصعد يدريك
مثل الفرقد ... للطف حدد
منهاج الحق للأبطال
...........................................................................................................

خادم الإمام الحسين عليه السلام
عمار هليل الواسطي
قصائد محرم الحرام ١٤٤٤ هجرية باز کردن / نظر دهید

2022-07-04 17:46:00 ليلة ٤ محرم الحرام { أم البنين عليها السلام}
قصيدة ( باب الدموع )

أناشد والمدامع سلوة العين
يدرب الغاضريه وين الحسين ؟
حزن فگده دهاني
أتاني وما أجاني... وين الحسين ؟
........................................................................................................

أنا أم الأربعة النذرت ولدهه
فده لأبن الزچيه الغالي عدهه
على درب الضعن طول نشدهه
أنا الروحي تناطرهم بعدهه

صحت يا ليل وافيني بالأخبار
شنو حال العزيز الفارگ الدار ؟
يليل الهَمْ سباني
أتاني وما أجاني... وين الحسين ؟
........................................................................................................

نهاري بلا ضوه وكل ليلي حسرات
وعلى بالي تجيني هواي حسبات
من طوّح الحادي والأمل مات
ما يلتم شملنه اردود هيهات

يطول الليل والحسبه طويله
واشاركهه بدمع ويا العليله
گطع بيه زماني
أتاني وما أجاني... وين الحسين ؟
........................................................................................................

على طول الدرب مشبوحه العيون
إذا مرسال يوصل محنتي اتهون
ميهمني بنيني ما يرجعون
ردت بس أبو الأكبر سالم يكون

نذر أزرع دموعي بدربه اورود
أفك نذري اشوكت والغايب يعود
سهم هجره رماني
أتاني وما أجاني... وين الحسين ؟
........................................................................................................

على طول المسافه حسرتي اتطول
حيره وما لگيت الحيرتي احلول
والتفارگ ظناهه شتگدر اتگول
تحلم بس تشوف الحلم مكتول

گلبي الما فرح شايل حنيني
بده يعلم فلا يخلص ونيني
لأبو اليمه خذاني
أتاني وما أجاني... وين الحسين ؟
........................................................................................................

أكابر عالحزن وتزيد الهموم
وأنا بكل يوم أگول يبين اليوم
أصبر والگلب بالصبر ملزوم
رغم هم الليالي وحيلي مهدوم

أشد حيلي بصبر والگه الأمل صاح
يم عباس أبد ما يرجع الراح
دهر فگده ولاني
أتاني وما أجاني... وين الحسين ؟
........................................................................................................

أتاني وروحي بين الحسره والآه
أدور عن حبيبي ووين الگاه
الفديته بالبنين الراحوا اوياه
سكن روحي يعالم صعبه أنساه

حزينه وفوّضت للباري أمري
آلهي بحسرتي اعله حسين يدري
أعاني شگد أعاني
أتاني وما أجاني... وين الحسين ؟
........................................................................................................

خادم الإمام الحسين عليه السلام
عمار هليل الواسطي
قصائد محرم الحرام ١٤٤٤ هجرية باز کردن / نظر دهید

2022-07-04 17:28:19 ليلة ٣ محرم الحرام { فاطمة العليلة ع }
قصيدة ( عيوني )

عيوني النساهه النوم طول الليالي
وشل دمعهه اعليك وينك يغالي
چم ليله بعدك ساهرت
يا بويه ليش اتأخرت ... وينك يغالي
........................................................................................................

اني العليله والحزن دهاني
يطلبني بيمن من گصه زماني
ويا الضعن والدي ما خذاني
طوّل غيابه وما أظن نساني

بس ربنا يعلم ليش ما رد عليه
وعيوني مشبوحات عالغاضريه
محتاره بهمومي صرت
يا بويه ليش اتأخرت ... وينك يغالي
........................................................................................................

زاد اشتياقي والگلب يكابر
يا والدي يالتجبر الخواطر
فكري بغيابك من عفتني حاير
شيصير بيه لو لفاني باچر

ما عندي راحة بال والعلّه بيه
فوگ المرض فرگاك شيصح بِدَيّه
بويه لقدومك ناطرت
يا بويه ليش اتأخرت ... وينك يغالي
........................................................................................................

لوما تردلي تبتدي الهضيمه
من ما أشوفك دنيتي حريمه
هسه ابتدت مشاعر اليتيمه
ذايب دليلي والحزن غريمه

يترادفن بالآه علتي وغيابك
أسأل وأريد اجواب وينه جوابك
وبذكرياتي اتحيرت
يا بويه ليش اتأخرت ... وينك يغالي
........................................................................................................

يالساكن بروحي اشوكت أشوفك
شنهيه يا بعد العمر ظروفك
فدوة العليله لأربعة حروفك
لو عيني غمضت أنتظر طيوفك

لا من إجيت بطيف لا راحه عندي
ليلي ونهاري يسيل دمعي اعله خدي
بهذا الغياب تأثرت
يا بويه ليش اتأخرت ... وينك يغالي
........................................................................................................

ما ينوصف يا والدي حنيني
لا ينگطع من غيبتك ونيني
أنطر تجيني وأدري ما تجيني
أول سنيني اتيتمت سنيني

بعده العمر ما صار حمل المصايب
هم عله تاذي الروح هم انته غايب
وين السفر يلسافرت
يا بويه ليش اتأخرت ... وينك يغالي
........................................................................................................

يا بويه طالت غيبتك عليه
وشلون اشوفك ما يصح بديه
هاك العمر كل العمر هديه
بس أنتظر سالم ترد إليه

كل العمر يفداك بس كونك تعود
أحچي وتگلي الروح شيردك اردود
من گد محنتي اتغيرت
يا بويه ليش اتأخرت ... وينك يغالي
........................................................................................................

خادم الإمام الحسين عليه السلام
عمار هليل الواسطي
قصائد محرم الحرام ١٤٤٤ هجرية باز کردن / نظر دهید

2022-07-04 16:52:52 ليلة ٢ محرم الحرام { الخدمة الحسينية}
قصيدة ( خدمة بكرامة )

تتاني بشوگ أيامك ... بكرامه تعيش خِدامك
رغم أحزانه وآلامه
محرم تعشگ أيامه
بكرامه تعيش خِدامك
...............................................................................................................

ولي النعمة وچبيره هواي هالنعمه
وين أحلى بعد من نعمة الخدمه
أحبابك خدم تأمر يبو اليمه
كل عاشور تثبت موقف الكلمه

تعيش آهات أحزانك ... دمع والآه عنوانك
خدم بس رافعه الهامه
محرم تعشگ أيامه
بكرامه تعيش خِدامك
...............................................................................................................

يحسين الحزن ما تگظي سالفته
بگلوب التحبك شوف عاطفته
چم عام المضه وما لحظه عايفته
حلفت ما تحب لو إنته لو إنته

عشگهه دموع لمصابك ... حزينه تنوح يم بابك
هواك العبره أنسامه
محرم تعشگ أيامه
بكرامه تعيش خِدامك
...............................................................................................................

بكرامه تعيش خِدامك يبو الأكبر
على طول السنه لعاشور تتحضر
ملوك بخدمتك عالناس تتصدر
تلم شمل اليحبك والشمل يكبر

تلم شمل اليحبونك... عمرهم فدوه لعيونك
ملك وملوك خدامه
محرم تعشگ أيامه
بكرامه تعيش خِدامك
...............................................................................................................

مجالس عامره وبخدمتك تلتم
شعار أحزانهه من ليل المحرّم
ازغار إكبار لجلك بقت تتألم
هامت بيك يا أعظم نصر للدم

يبو الأكبر وحق دمك ... تباهي العالم بأسمك
حُسين وتلبس اوسامه
محرم تعشگ أيامه
بكرامه تعيش خِدامك
...............................................................................................................

وحق أربع حروفك وانته سيدهه
كلهه اولادك وتبقه انته والدهه
غيرك يا عزيز الزهره ما عدهه
الوادم تدري بيك اتعرف مگصدهه

تعرفك تدري غايتهه ... تجيك بصافي نيتهه
سواد الخادم أحرامه
محرم تعشگ أيامه
بكرامه تعيش خِدامك
...............................................................................................................

دولة امن الخدم تحضر تشد احزام
تواسي بكل مسيه بكل شهر كل عام
تواسي المنتظر بالدمعه والآلام
هيه أيام بس شلونهه الأيام

حزينه وتفجع الصابر ... أليمه وتكسر الخاطر
سوادك رافع أعلامه
محرم تعشگ أيامه
بكرامه تعيش خِدامك
...............................................................................................................

خادم الإمام الحسين عليه السلام
عمار هليل الواسطي
قصائد محرم الحرام ١٤٤٤ هجرية باز کردن / نظر دهید

2022-07-04 15:53:44 ليلة ١ محرم الحرام { هلال الشهر }
قصيدة ( دمعة فاطمة )

هلال الفاجعة ... أول مقْدمــه
يرسم بالسمه ... دمعة فاطمه
ليالي الغاضرية... نواسي بكل مسيّه
دمعة فاطمه
.........................................................................................................

ليالي الدمع هلّت والدمع سلوه
يسوه المال شهر حسين أبو النخوه
صوت امن السمه بنبرة حزن دوّه
بده شهر الحزن يا أهل المروّه

كلمن موقفه ... حزنه والألم
تجمعهه الخدم ... دمعة فاطمه
لأجل روح الزچيه .. نواسي بكل مسيّه
دمعة فاطمه
.........................................................................................................

نطالع بالسمه لا ما نشوف هلال
جرح ينزف مصائب والليالي اثگال
على حسين الفرض يبقه الدمع همال
بثگل هم المصيبه الما تشيله اجبال

ليليه جرح ... مأتم كل مسه
ونواسي عسه... دمعة فاطمه
منيه تجر منيه .. نواسي بكل مسيّه
دمعة فاطمه
.........................................................................................................

عاشور الحزن لچمت دهر بينه
اله جمرة حزن بالگلب تچوينه
ما يخلص لطمنه ولا نواعينه
بمجالسنه العمر بيهن تربّينه

وبهذا العهد ... من شهره يهل
مفتوح السجل ... دمعة فاطمه
سجل خدمه وقضيه .. نواسي بكل مسيّه
دمعة فاطمه
.........................................................................................................

نعايشهه الليالي بكل گلب صابر
تبدي الليله تگظي ونجهز الباچر
وبتاسع محرم صرخة الحاضر
دخيلك يا محرم لا يجي العاشر

يصعب موعده ... بينه شما يمر
بكل مهجه الجمر ... دمعة فاطمه
ثگيله هالرزيه .. نواسي بكل مسيّه
دمعة فاطمه
.........................................................................................................

بكل مجلس عزاء أم الحسن تحضر
شرط من ينطي حق الفاجعه المنبر
اليحضر في سبيل الله من يحضر
الراد الآخره يطمئن بالمحشر

يتواضع إذا ... ربنا ايوفّقه
حلمه تحققه ... دمعة فاطمه
خدمة بصافي نيه .. نواسي بكل مسيّه
دمعة فاطمه
.........................................................................................................

أول ليله هاي بشهر المحرّم
مفجوعه الخلگ والدمع لون الدم
حزنانه الليالي والنهار أظلم
السواد أصبح شعار الرسمي للمأتم

يهلال الكدر ... صحنه بكل حزن
بليلك من يجن ... دمعة فاطمه
أحزانك هويه .. نواسي بكل مسيّه
دمعة فاطمه
.........................................................................................................

خادم الإمام الحسين عليه السلام
عمار هليل الواسطي
قصائد محرم الحرام ١٤٤٤ هجرية باز کردن / نظر دهید

2022-07-04 15:38:35 باز کردن / نظر دهید

2022-07-04 02:16:42 مقطع من قصيدة يمته تعود
ملا قحطان البديري
عمار هليل الواسطي باز کردن / نظر دهید

2022-07-04 02:15:18 شعار محرم الحرام لهذا العام باز کردن / نظر دهید

2022-06-20 23:56:57 مقطع من قصيدة { راحت أمي }
الحاج ملا باسم الكربلائي.
عمار هليل الواسطي باز کردن / نظر دهید

2022-06-20 23:55:58 قريباً وعلى بركة الله سبحانه وتعالى وبإذنه عزوجل ..

سيكون منهاج قصائد محرم الحرام للسنة الهجرية الجديدة ١٤٤٤ / ٢٠٢٢ ميلادية هنا على قناة التلغرام ..

تمنياتي لكم بالتوفيق في خدمة أهل بيت النبوة عليهم السلام.

أخوكم
الشاعر عمار هليل الواسطي
ذي القعدة / ١٤٤٣ هجري باز کردن / نظر دهید